උතුරු පළාතේ වන සංරක්ෂණ දෙපාර්තමේන්තුව සතු ඉඩම් නිදහස් කර ගැනීමට පියවර

උතුරු පළාත් ආණ්ඩුකාරවරයාගේ ප්‍රධානත්වයෙන් පැවති විශේෂ සාකච්ඡාවකදී, එම පළාතේ වන සංරක්ෂණ දෙපාර්තමේන්තුව, වනජීවී දෙපාර්තමේන්තුව සහ වෙරළ සංරක්ෂණ දෙපාර්තමේන්තුව යටතේ පවතින ඉඩම් සම්බන්ධ ගැටලු පිළිබඳව දීර්ඝ වශයෙන් කරුණු සාකච්ඡා කෙරිණි.

මෙම දෙපාර්තමේන්තු සතු ඉඩම් තුළ ජනතාවගේ නිවාස සහ ජීවනෝපාය මාර්ග සඳහා භාවිත කළ ඉඩම් ද ඇතුළත්ව පවතින බව මෙහිදී අනාවරණය විය. 1984 වසරේදී තම නිජබිම්වලින් අවතැන් වූ ජනතාවට අදටත් එම ඉඩම් වෙත යළි පිවිසීමට නොහැකි වී තිබීම බරපතළ ගැටලුවක් බව පෙන්වා දෙන ලදී.

මෙම ඉඩම් ගැටලු හේතුවෙන් උතුරු පළාතේ සංවර්ධන සහ ප්‍රතිසංස්කරණ කටයුතු සිදු කිරීමේදී විශාල බාධාවන් මතු වී ඇති බව ආණ්ඩුකාරවරයා සඳහන් කළේය. ඒ අනුව, කැබිනට් මණ්ඩලය විසින් පත් කරන ලද කමිටුව වෙත දිස්ත්‍රික් ලේකම් කාර්යාල මගින් නිර්දේශ කර ඇති ඉඩම් කඩිනමින් නිදහස් කර දෙන ලෙස ඔහු ඉල්ලා සිටියේය.

පවතින නීතිමය සහ පරිපාලනමය බාධක ඉවත් කරමින්, ජනතාවගේ ඉඩම් අයිතිය තහවුරු කිරීම සහ කලාපයේ සංවර්ධන කටයුතු වේගවත් කිරීම මෙම සාකච්ඡාවේ ප්‍රධාන අරමුණ වී තිබේ.