උපන්දිනය සැමරීමෙන් වළකින ලෙස රසිකයන්ගෙන් සූරියා ඉල්ලයි

දකුණු ඉන්දීය සිනමාවේ ජනප්‍රිය නළු සූරියා සිවකුමාර් සිය 51 වන උපන්දිනය වෙනුවෙන් විශේෂ ඉල්ලීමක් සිදු කර තිබේ. තම උපන්දිනය වෙනුවෙන් කිසිදු ආකාරයක සැමරුමක් හෝ කේක් කැපීමක් සිදු නොකරන ලෙස ඔහු සිය රසික පිරිසෙන් කාරුණිකව ඉල්ලා ඇත.

සිය නිවස අසලට රැස්ව සිටි රසිකයන් හමුවෙමින් සූරියා මෙම අදහස් පළ කළේය. සෑම වසරකම සූරියාගේ උපන්දිනය වෙනුවෙන් රසිකයන් විවිධ සමාජ සේවා කටයුතු සහ සැමරුම් සංවිධානය කිරීම සිරිතක් වුවද, මෙවර එම කටයුතුවලින් වැළකී සිටින ලෙස ඔහු දන්වා තිබේ.

නව දිල්ලියේ නීට් (NEET) විභාගයට එරෙහිව අරගලයක නිරත වන සිසුන්ගේ හැඟීම්වලට ගරු කිරීමක් වශයෙන් මෙම තීරණය ගත් බව ඔහු පෙන්වා දෙයි. පවතින සංවේදී වාතාවරණය හමුවේ උපන්දිනය සැමරීම සුදුසු නොවන බව නළුවාගේ අදහස වී තිබේ.

සූරියාගේ මෙම තීරණය ඔහුගේ රසිකයන් අතර මෙන්ම සමාජ මාධ්‍ය තුළද මේ වන විට කතාබහට ලක්ව ඇත. අසීරු අවස්ථාවකදී අරගල කරන පිරිසක් වෙනුවෙන් ඔහු දක්වන මෙම සහයෝගය බොහෝ දෙනෙකුගේ පැසසුමට ලක්ව තිබේ.