ශ්රී ලංකාව සහ බෙල්ජියම අතර විද්යාත්මක සහයෝගීතාව ශක්තිමත් කර ගැනීමේ අරමුණින් බෙල්ජියමේ විද්යා ප්රතිපත්ති කාර්යාලය (BELSPO) සහ ශ්රී ලංකා තානාපති කාර්යාලය අතර විශේෂ සාකච්ඡාවක් පවත්වා ඇත. මෙම හමුව පසුගිය ජූලි 06 වන දින බ්රසල්ස් නුවර පිහිටි BELSPO මූලස්ථානයේදී පැවැත්විණි.
මෙම සාකච්ඡාව සඳහා බෙල්ජියමේ ශ්රී ලංකා තානාපති චන්දන වීරසේන මහතා සහ BELSPO ආයතනයේ ෆෙඩරල් සහ ජාත්යන්තර සම්බන්ධීකරණ අංශයේ ප්රධානී ආචාර්ය මාර්ක් වැන්හෝල්ස්බෙක් මහතා ඇතුළු පිරිසක් එක්ව සිටියහ. දෙරට අතර ආයතනික සබඳතා ගොඩනගා ගැනීම සහ විද්යාත්මක ක්ෂේත්රයේ පවතින අවස්ථා පිළිබඳව මෙහිදී දීර්ඝ වශයෙන් කරුණු සාකච්ඡා කෙරිණි.
විශේෂයෙන්ම දේශගුණික විපර්යාස පිළිබඳ විද්යාව, සමුද්රීය පර්යේෂණ සහ ජෛව තාක්ෂණය යන ක්ෂේත්රයන්හි ශ්රී ලංකාව සහ බෙල්ජියම අතර සහයෝගීතාව වර්ධනය කර ගැනීමට ඇති හැකියාව පිළිබඳව තානාපතිවරයා මෙහිදී අවධාරණය කළේය. නවෝත්පාදන සහ විද්යාත්මක පර්යේෂණ ක්ෂේත්රවල හවුල්කාරිත්වය දෙරටේ අන්යෝන්ය සමෘද්ධිය සඳහා ඉවහල් වනු ඇති බවද ඔහු පෙන්වා දුන්නේය.
බෙල්ජියමේ විද්යා ප්රතිපත්ති සම්බන්ධයෙන් කටයුතු කරන ප්රධානතම ආයතනය වන BELSPO, අභ්යවකාශ පර්යේෂණ, දේශගුණික අධ්යයන සහ විද්යාත්මක වැඩසටහන් සඳහා අරමුදල් සැපයීම ඇතුළු පුළුල් පරාසයක කටයුතු සිදු කරයි. මෙම හවුල්කාරිත්වය හරහා ඉදිරියේදී විද්යාත්මක ක්ෂේත්රයේ නව සන්ධිස්ථානයක් කරා ළඟා වීමට දෙරටම අපේක්ෂා කරයි.
