පාකිස්තානයේ ආරක්ෂක අංශ සහ පොලිස් ආයතන ඉලක්ක කර ගනිමින් චීනය සහ ඉන්දියාවට සම්බන්ධ හැකර් කණ්ඩායම් විසින් වෙන වෙනම සයිබර් ප්රහාර මාලාවක් එල්ල කර ඇති බව සෙන්ටිනල්වන් (SentinelOne) සයිබර් ආරක්ෂක සමාගම සිය නවතම වාර්තාව මගින් අනාවරණය කර තිබේ.
මෙම සයිබර් ඔත්තු බැලීමේ ක්රියාකාරකම් 2024 වසරේ පෙබරවාරි මාසයේ සිට 2026 අප්රේල් මාසය දක්වා කාලය තුළ සිදුව ඇති බව එම වාර්තාවේ සඳහන් වේ. පාකිස්තානයේ අභ්යන්තර ආරක්ෂාව, ත්රස්තවාදී තත්ත්වයන්, ඇෆ්ගනිස්ථානය සමඟ පවතින දේශසීමා ගැටලු සහ චීනය සමඟ පවතින ආර්ථික සබඳතා පිළිබඳ තොරතුරු ලබා ගැනීම මෙම ප්රහාරවල මූලික අරමුණ වී ඇති බව විශ්ලේෂකයින් පෙන්වා දෙයි.
චීන හැකර්වරුන් මෙම ප්රහාර හරහා පාකිස්තානයේ සේවය කරන චීන ජාතිකයින්ගේ ආරක්ෂාව නිරීක්ෂණය කිරීමට උත්සාහ දරා ඇති බවත්, ඉන්දීය හැකර්වරුන් දෙරට අතර පවතින දේශසීමා ආතතීන් පිළිබඳ තොරතුරු සොයා බැලීමට උත්සාහ කර ඇති බවත් වාර්තා වේ.
මෙම චෝදනා සම්බන්ධයෙන් ප්රතිචාර දක්වමින් වොෂින්ටනයේ පිහිටි චීන තානාපති කාර්යාලය ප්රකාශ කර ඇත්තේ, චීනය ඕනෑම ආකාරයක සයිබර් ප්රහාරයකට දැඩි ලෙස විරුද්ධ බවත්, සිය රටේ යටිතල පහසුකම් එවැනි කටයුතු සඳහා භාවිතා කිරීමට ඉඩ නොදෙන බවත්ය. කෙසේ වෙතත්, ඉන්දීය තානාපති කාර්යාලය මේ දක්වා ඒ පිළිබඳව නිල ප්රකාශයක් සිදු කර නොමැත.
මේ අතර, කයිබර් පක්තුන්ක්වා පොලිසිය පවසා ඇත්තේ පසුගිය කාලයේ සයිබර් ආක්රමණ උත්සාහයන් වැඩි වූවද, තම ආයතනයේ කිසිදු සංවේදී දත්තයක් සොරකම් කිරීමට හැකර්වරුන්ට නොහැකි වූ බවයි.
