බ්රිතාන්ය සම්මානලාභී රංගන ශිල්පිනියක සහ පතල් උපදේශක කණ්ඩායමේ (MAG) තානාපතිනියක වන රොසමුන්ඩ් පයික් මහත්මිය විශේෂ සංචාරයක් සඳහා ශ්රී ලංකාවට පැමිණ ඇත. රට තුළ දශක ගණනාවක් පුරා පැවති බිම්බෝම්බ සහ පුපුරන ද්රව්ය ඉවත් කිරීමේ මෙහෙයුම්වල තීරණාත්මක අවසාන අදියර නිරීක්ෂණය කිරීම ඇගේ මෙම සංචාරයේ අරමුණයි.
යුද්ධයෙන් පසු හඳුනාගත් බිම්බෝම්බ සහිත භූමි ප්රමාණයෙන් 90%කට වැඩි ප්රමාණයක් මේ වන විට සාර්ථකව ඉවත් කර අවසන් බව වාර්තා වේ. ඉතිරිව ඇත්තේ මුළු භූමි ප්රමාණයෙන් 10%කටත් වඩා අඩු ප්රමාණයක් පමණක් වන අතර, එම ප්රදේශ වැඩි වශයෙන් උතුරු සහ නැගෙනහිර පළාත්වල පිහිටා ඇත.
සිය සංචාරය අතරතුර මන්නාරම සහ මුලතිව් දිස්ත්රික්කවල සංචාරය කිරීමට නියමිත පයික් මහත්මිය, බිම්බෝම්බ ඉවත් කිරීමේ නිරත කාර්ය මණ්ඩලය, ඉන් පීඩාවට පත් පවුල් සහ පාසල් දරුවන් හමුවීමට අපේක්ෂා කරයි. මීට අමතරව, අග්රාමාත්ය ආචාර්ය හරිනි අමරසූරිය මහත්මිය ඇතුළු රජයේ ඉහළ පෙළේ නිලධාරීන් කිහිප දෙනෙකු ද ඇය හමුවීමට නියමිතය.
2002 වසරේදී 252ක් ලෙස වාර්තා වූ බිම්බෝම්බ අනතුරු සංඛ්යාව, ක්රියාත්මක කළ දැනුවත් කිරීමේ වැඩසටහන් සහ ඉවත් කිරීමේ මෙහෙයුම් හේතුවෙන් 2024 වසර වන විට 2 දක්වා පහත වැටී තිබීම කැපී පෙනෙන ජයග්රහණයකි. මෙම ඉතිරි භූමි ප්රමාණය ද නිදහස් කර ගැනීම තුළින් උතුරු හා නැගෙනහිර පළාත්වල සංවර්ධන කටයුතු සහ ආර්ථික වර්ධනය සඳහා නව මාවත් විවර වනු ඇතැයි අපේක්ෂා කෙරේ.
