ගර්භණී සමයේදී පැරසිටමෝල් භාවිත කිරීම ගැහැණු දරුවන්ගේ අනාගත සරුභාවයට බලපෑම් කළ හැකි බවට නවතම වෛද්ය පර්යේෂණයකින් ඉඟි පළ වී ඇත. මෙම අධ්යයනය මගින් පැරසිටමෝල්වලට නිරාවරණය වූ මව්වරුන්ට උපන් ගැහැණු දරුවන්ගේ ප්රජනන පද්ධතියේ ව්යුහයන්හි යම් වෙනස්කම් නිරීක්ෂණය කර තිබේ.
පර්යේෂකයන් පෙන්වා දෙන පරිදි, මෙලෙස නිරාවරණය වූ දරුවන්ගේ ඩිම්බ කෝෂවල ප්රමාණය සාමාන්යයට වඩා සියයට 40කින් පමණ අඩු වී ඇති අතර ගර්භාෂ ප්රමාණය සියයට 13කින් පමණ අඩු වී ඇත. එසේම ඩිම්බ නිපදවීමට දායක වන ෆොලිකල් සංඛ්යාව ද සියයට 23කින් පමණ පහත වැටී ඇති බව වාර්තා වේ.
කෙසේ වෙතත්, මෙම සොයාගැනීම් මත පදනම්ව නිශ්චිත නිගමනවලට එළඹීමට තවමත් කල් වැඩි බව පර්යේෂකයන් අවධාරණය කරයි. නිරීක්ෂණය කළ මෙම වෙනස්කම් අනාගතයේදී කාන්තාවන්ගේ සරුභාවයට හෝ ආර්තවහරණයට එළඹෙන වයසට සෘජුවම බලපාන්නේද යන්න තවමත් තහවුරු වී නොමැත.
මෙම පර්යේෂණය මෙහෙයවූ වෛද්ය මාග්රිත් බිස්ට්රප් ෆිෂර් මහත්මිය සඳහන් කළේ, මෙම සොයාගැනීම් සම්බන්ධයෙන් ගර්භණී මව්වරුන් අනවශ්ය ලෙස කනස්සල්ලට පත් නොවිය යුතු බවයි. මෙය ජනගහන මට්ටමේ සම්බන්ධතාවක් අධ්යයනය කළ පර්යේෂණයක් මිස තනි පුද්ගලයෙකුගේ අනාගත ප්රතිඵල පුරෝකථනය කළ හැකි එකක් නොවන බව ඇය වැඩිදුරටත් පැවසුවාය.
වර්තමානයේදී ගර්භණී සමයේදී උණ සහ වේදනාව සඳහා නිර්දේශ කෙරෙන ප්රධාන ඖෂධය පැරසිටමෝල් වේ. සෞඛ්ය විශේෂඥයන් උපදෙස් දෙන්නේ අවශ්යම අවස්ථාවකදී පමණක්, අවම මාත්රාවක් සහ කෙටි කාලයක් සඳහා පමණක් එය භාවිත කරන ලෙසයි. ප්රතිකාර නොකළ උණ හෝ වේදනාව නූපන් දරුවාට වඩා වැඩි අවදානමක් ඇති කළ හැකි බව ද ඔවුන් පෙන්වා දෙයි.
