වයඹ ජනකලා පදනම සහ සියපත කලා සංගමය එක්ව සංවිධානය කළ විශේෂ අධ්යාපනික සහ සංස්කෘතික ප්රදර්ශනය හා සැණකෙළිය ආරම්භ කිරීමේ අවස්ථාවට එක්වෙමින් අග්රාමාත්ය ආචාර්ය හරිනි අමරසූරිය මහත්මිය මේ බව සඳහන් කළාය. මෙම උත්සවය සැප්තැම්බර් 12 වන දින වයඹ ජන කලා කේන්ද්රයේදී ආරම්භ විය.
උත්සවය අමතමින් අග්රාමාත්යවරිය අවධාරණය කළේ රටක සංවර්ධනය යනු හුදෙක් ගොඩනැගිලි සහ පාරවල් ඉදිකිරීම පමණක් නොවන බවයි. “කොන්ක්රීට් නගරයක් තුළ වුවද සංවේදීතාවයක් හෝ තෘප්තියක් නොමැති නම් එම ජීවිත හිස් එකක් බවට පත්වනවා. සැබෑ සතුට සහ තෘප්තිය උදෙසා අප එකිනෙකා තේරුම් ගැනීම සහ සමගිය අත්යවශ්යයි,” යනුවෙන් ඇය වැඩිදුරටත් පැවසුවාය.
නවීන තාක්ෂණය සමඟ වේගයෙන් වෙනස් වන සමාජයක් තුළ අපගේ අනන්යතාවය සුරකිමින් අභියෝගවලට මුහුණ දීමේ වැදගත්කම ද අග්රාමාත්යවරිය පෙන්වා දුන්නාය. විවෘත මනසකින් යුතුව අන්යයන්ගේ අදහස්වලට ගරු කරමින් ජීවිතය පුළුල් කරගන්නා ලෙස ඇය තරුණ පරපුර ඇතුළු සියලු දෙනාගෙන් ඉල්ලා සිටියාය.
සැප්තැම්බර් 12 සිට 18 දක්වා පැවැත්වෙන මෙම ප්රදර්ශනය පාසල් සිසුන්, ගුරුවරුන් සහ කලා ලැදි ජනතාව ඉලක්ක කරගනිමින් සංවිධානය කර ඇත. මෙහිදී වයඹ පළාතේ කලා ක්ෂේත්රයට සුවිශේෂී දායකත්වයක් ලබාදුන් ප්රවීණ කලාකරුවන් කිහිප දෙනෙකු ඇගයීමට ලක් කිරීම ද සිදු විය.
මෙම අවස්ථාවට වයඹ පළාත් ආණ්ඩුකාරවරයා, මැති ඇමතිවරුන්, රාජ්ය නිලධාරීන් සහ ප්රදේශවාසීන් ඇතුළු විශාල පිරිසක් සහභාගී වූහ.
