ශ්‍රී ලංකා ගුවන් හමුදාව විසින් සංවිධානය කරන ලද 18 වැනි ගුවන් හමුදා විවෘත වෘත්තීය ස්කොෂ් ශූරතාවලිය (PSA) පසුගිය ඔක්තෝබර් 10 වැනි දින රත්මලාන ගුවන් හමුදා කඳවුරු ස්කොෂ් ක්‍රීඩාංගණයේදී පැවැත්විණි. දේශීය හා විදේශීය ක්‍රීඩක ක්‍රීඩිකාවන් 200කට අධික සංඛ්‍යාවක් සහභාගී වූ මෙම තරගාවලිය ජාත්‍යන්තර රෙගුලාසිවලට අනුකූලව ශ්‍රී ලංකා ස්කොෂ් සම්මේලනයේ අධීක්ෂණය යටතේ පැවැත්විණි.
මෙම අවස්ථාව සඳහා ප්‍රධාන ආරාධිත අමුත්තා ලෙස ශ්‍රී ලංකා ගුවන් හමුදාවේ නියෝජ්‍ය මාණ්ඩලික ප්‍රධානී එයාර් වයිස් මාර්ෂල් පද්මන් ද කොස්තා මහතා සහභාගී විය. ශ්‍රී ලංකා ස්කොෂ් සම්මේලනයේ සභාපති ගෲප් කැප්ටන් එරන්ද ගීගනගේ මහතා ඇතුළු ක්‍රීඩා ක්ෂේත්‍රයේ ප්‍රවීණයන් සහ ගුවන් හමුදා නිලධාරීන් රැසක් ද මෙම අවස්ථාවට එක්ව සිටියහ.
තරගාවලියේ උද්යෝගිමත් අවසානයක් සනිටුහන් කරමින් පිරිමි විවෘත අංශයේ ශූරතාව දිනා ගැනීමට රවීන්ද්‍ර ලක්සිරි සමත් වූයේ ශමිල් වකීල් පරාජය කරමිනි. කාන්තා විවෘත අංශයේ ශූරතාව චනිත්ම සිනෙලි විසින් දිනා ගත්තේ රන්ලියා වුඩ් පරාජය කරමින් ඉතා තරගකාරී තරගයකින් පසුවය.
පිරිමි විවෘත අංශය සඳහා එයාර් චීෆ් මාර්ෂල් පී.එච්. මෙන්ඩිස් අනුස්මරණ කුසලානය ද, කාන්තා විවෘත අංශය සඳහා එයාර් චීෆ් මාර්ෂල් හැරී ගුණතිලක අනුස්මරණ කුසලානය ද පිරිනැමීමට කටයුතු යොදා තිබිණි. වයස් කාණ්ඩ සහ නවක ක්‍රීඩකයන් සඳහා ද වෙන වෙනම තරග ඉසව් පැවැත්වූ අතර, දක්ෂතා දැක්වූ ක්‍රීඩක ක්‍රීඩිකාවන් වෙත කුසලාන සහ සහතිකපත් ප්‍රදානය කෙරිණි.
