බැංකු නිලධාරියෙකු ලෙස පෙනී සිටිමින් සිදුකළ වංචනික දුරකථන ඇමතුමකට රැවටීමෙන් 70 හැවිරිදි පුද්ගලයෙකුගේ බැංකු ගිණුමෙන් රුපියල් මිලියන 4.6ක මුදලක් වංචනික ලෙස ලබාගෙන ඇති බව වාර්තා වේ.
වෛද්‍ය අමිල ප්‍රනාන්දු මහතා සිය සමාජ මාධ්‍ය ගිණුමේ සටහනක් තබමින් සඳහන් කර ඇත්තේ, බදු ගණනය කිරීමේ කටයුත්තක් සඳහා බැංකුවෙන් අමතන බව පවසමින් වංචාකරුවෙකු තම පියාට දුරකථන ඇමතුමක් ලබාදුන් බවයි.
එම ඇමතුමේදී බැංකු ගිණුම් තොරතුරු සහ එක්වරක් පමණක් භාවිත කළ හැකි මුරපද (OTP) ලබාගැනීමට වංචාකරු කටයුතු කර ඇත. එම තොරතුරු ලබාදීමත් සමඟම ගිණුමේ තිබූ රුපියල් මිලියන 4.6ක මුදල වංචනික ලෙස ඉවත් කරගෙන තිබේ.
මෙම සිදුවීම සම්බන්ධයෙන් අදාළ බැංකුව සමඟ සිදුකළ සාකච්ඡාවකදී, එම සතිය තුළම මෙවැනිම ආකාරයේ වංචා සිදුවීම් දෙකක් වාර්තා වී ඇති බවද අනාවරණය වී ඇත.
කිසිදු බැංකුවක් හෝ රාජ්‍ය ආයතනයක් දුරකථනයෙන් OTP අංක, PIN අංක හෝ රහස් මුරපද ඉල්ලා නොසිටින බව බලධාරීන් නැවත නැවතත් අවධාරණය කරයි. මෙවැනි සැක සහිත ඇමතුමක් ලැබුණු වහාම එය විසන්ධි කර, බැංකුවේ නිල දුරකථන අංකයක් ඔස්සේ සෘජුවම සම්බන්ධ වී තොරතුරු තහවුරු කරගන්නා ලෙස ජනතාවගෙන් ඉල්ලා සිටී.
