‘Fast & Furious’ චිත්‍රපට මාලාවෙන් දැකගත හැකි වේගවත් මෝටර් රථ සහ වීදි ධාවන සංස්කෘතිය සැබෑවටම අත්විඳීමේ අරමුණින් විදෙස් සංචාරකයන් විශාල පිරිසක් මේ වනවිට ජපානය වෙත ඇදී එමින් සිටිති. විශේෂයෙන්ම ජපානයටම ආවේණික ‘Japanese Domestic Market’ හෙවත් JDM සංස්කෘතිය කෙරෙහි සංචාරකයන්ගේ වැඩි අවධානයක් යොමුව තිබේ.
Toyota, Honda සහ Nissan වැනි ජපන් මෝටර් රථ නවීකරණය කරමින් ඒවායේ කාර්යසාධනය සහ පෙනුම ඉහළ නැංවීම මෙම සංස්කෘතියේ මූලික ලක්ෂණයයි. සමාජ මාධ්‍ය හරහා ලැබෙන ප්‍රචාරය සහ යෙන් මුදල් ඒකකයේ අගය පහළ යාම මෙම සංචාරක ආකර්ෂණය තවදුරටත් ඉහළ යාමට හේතු වී ඇත.
ටෝකියෝ නුවර පිහිටි ‘A Pit Autobacs’ වැනි මෝටර් රථ අමතර කොටස් අලෙවිසැල් සහ යොකොහාමා නගරයේ ඩයිකොකු අධිවේගී මාර්ග විවේක ස්ථානය මේ වනවිට මෝටර් රථ ලෝලීන්ගේ ප්‍රධානතම ගමනාන්ත බවට පත්ව තිබේ. එහිදී Nissan GT-R සහ Mazda RX-7 වැනි චිත්‍රපටවලින් ජනප්‍රිය වූ රථ දැකගැනීමේ අවස්ථාව සංචාරකයන්ට හිමිවේ.
මෙම ජනප්‍රියත්වයත් සමඟ සංචාරක සේවා ආයතන රැසක් JDM අත්දැකීම් ලබාගැනීමේ විශේෂ සංචාරක පැකේජ හඳුන්වා දී ඇත. කෙසේ වෙතත්, මෙම ස්ථානවල අධික ලෙස ජනතාව ගැවසීම හේතුවෙන් මාර්ග තදබදය සහ ආරක්ෂක ගැටලු වැනි තත්ත්වයන් ද වාර්තා වන බව විදෙස් මාධ්‍ය පෙන්වා දෙයි.
අනාගත පුරෝකථනයන්ට අනුව, 2033 වසර වනවිට JDM මෝටර් රථ සංස්කෘතිය ආශ්‍රිත වෙළෙඳපොළ ඇමරිකානු ඩොලර් බිලියන 6.1ක පමණ වටිනාකමක් දක්වා දෙගුණයකින් වර්ධනය වනු ඇතැයි අපේක්ෂා කෙරේ.
