වයස අවුරුදු 12ත් 13ත් අතර පසුවන දරුවන්ට ලබාදෙන HPV (හියුමන් පැපිලෝමා වයිරස්) එන්නත, ගැබ්ගෙල පිළිකා වැළැක්වීම සඳහා අතිශය සාර්ථක ක්රමවේදයක් බව නවතම පර්යේෂණ වාර්තා පෙන්වා දෙයි. මෙම එන්නත ලබා ගැනීම මගින් වයස අවුරුදු 30ක් වීමට පෙර ගැබ්ගෙල පිළිකා හේතුවෙන් මිය යාමේ අවදානම සම්පූර්ණයෙන්ම පාහේ නැති වී යන බව විද්යාඥයෝ පවසති.
එංගලන්තය තුළ 2008 වසරේ සිට පාසල් වියේ පසුවන දැරියන් සඳහා මෙම එන්නත්කරණය ආරම්භ කෙරිණි. එතැන් පටන් ගතවූ කාලය තුළ පමණක් කාන්තාවන් 200කගේ පමණ ජීවිත බේරා ගැනීමට මෙම එන්නත සමත්ව ඇති බව පර්යේෂකයන් පෙන්වා දෙයි. විශේෂයෙන්ම 2020 සිට 2024 දක්වා කාලය තුළ වයස අවුරුදු 20ත් 24ත් අතර කාන්තාවන් අතරින් ගැබ්ගෙල පිළිකා මරණ කිසිවක් වාර්තා නොවීම කැපී පෙනෙන කරුණකි.
ලන්ඩනයේ ක්වීන් මේරි විශ්වවිද්යාලයේ මහාචාර්ය පීටර් සාසියේනි මහතා පවසන පරිදි, එක් එන්නත් මාත්රාවකින් මෙවැනි පිළිකා තත්ත්වයක් පාලනය කිරීම වෛද්ය ක්ෂේත්රයේ ලැබූ විශාල ජයග්රහණයකි. එන්නත නොලැබුණේ නම් එම වයස් කාණ්ඩයේ මරණ 23ක් පමණ සිදුවීමට ඉඩ තිබූ බව ගණනය කර ඇත.
ගැබ්ගෙල පිළිකා ඇති වීමට 99%ක්ම හේතු වන්නේ සමට සම ස්පර්ශ වීමෙන් බෝවන HPV වෛරසයයි. බොහෝ ආසාදන ශරීරයෙන් ඉබේම සුව වුවද, ඇතැම් ආසාදන වසර ගණනාවකට පසු පිළිකා තත්ත්වයන් දක්වා වර්ධනය විය හැකිය. කෙසේ වෙතත්, එන්නත්කරණයට ලක්වන පිරිස වයස්ගත වීමත් සමඟ මෙම රෝගයෙන් සිදුවන මරණ සංඛ්යාව තවදුරටත් ශීඝ්රයෙන් පහත වැටෙනු ඇතැයි පර්යේෂකයෝ විශ්වාසය පළ කරති.
