මත්තල රාජපක්ෂ ජාත්යන්තර ගුවන්තොටුපළ (MRIA) ලාභ ලබන ව්යාපෘතියක් බවට පත් කිරීමේ අරමුණින් ක්රියාත්මක කෙරෙන සංවර්ධන වැඩසටහන සඳහා යෝජනා භාරගැනීමේ කාලසීමාව රජය විසින් දීර්ඝ කර ඇත. ඒ අනුව, මීට පෙර නියම කර තිබූ අවසන් දිනය වෙනුවට 2026 ජූලි 09 වැනිදා දක්වා අදාළ යෝජනා ඉදිරිපත් කිරීමට අවස්ථාව හිමිවේ.
මෙම ගුවන්තොටුපළ ඉදිකිරීම, ක්රියාත්මක කිරීම සහ පැවරීම (BOT) පදනම මත සංවර්ධනය කිරීමට රජය සැලසුම් කර ඇති අතර, ඒ සඳහා ඉන්දියාව, චීනය සහ එක්සත් අරාබි එමීර් රාජ්යය ඇතුළු රටවල් කිහිපයක ආයෝජකයන්ගේ අවධානය යොමුවී තිබේ. වරාය හා සිවිල් ගුවන් සේවා අමාත්යාංශය පවසන පරිදි, මේ වන විට පාර්ශ්ව 47ක් මූලික වශයෙන් සිය උනන්දුව පළ කර ඇත.
මෙම ව්යාපෘතිය සඳහා ඉදිරිපත් වන ආයෝජකයන් වෙත දැඩි සුදුසුකම් මාලාවක් ද පනවා තිබේ. විශේෂයෙන්ම, ඇමෙරිකානු ඩොලර් මිලියන 50ක අවම ශුද්ධ වත්කමක් සහ ICAO සහතික ලත් ගුවන්තොටුපළ කළමනාකරණ ක්ෂේත්රයේ වසර පහක පළපුරුද්දක් අනිවාර්ය කර ඇත.
මත්තල ගුවන්තොටුපළේ පවතින නීතිමය සහ මූල්යමය තත්ත්වයන් සැලකිල්ලට ගනිමින්, මෙම ව්යාපෘතිය සඳහා විශේෂ ආරක්ෂිත විධිවිධාන සලසා ඇති බවද අමාත්යාංශ ආරංචි මාර්ග සඳහන් කරයි. කෙසේ වෙතත්, පසුගිය අප්රේල් මාසයේදී අභිලාෂයන් කැඳවීමෙන් අනතුරුව මේ දක්වා ලැබී ඇති යෝජනා පිළිබඳව නිශ්චිත තොරතුරු රජය විසින් මෙතෙක් ප්රකාශයට පත් කර නොමැත.
