කටාර් රාජ්යයේ රාස් ලෆාන් කාර්මික කලාපයේ පිහිටි බාර්සාන් ගෑස් සැපයුම් පහසුකමේ ඊයේ (21) දින සිදුවූ දරුණු පිපිරීමකින් පුද්ගලයින් 13 දෙනෙකු මියගොස් තවත් 66 දෙනෙකු තුවාල ලබා ඇති බව එරට බලශක්ති අමාත්ය සාද් අල්-කාබි මහතා නිවේදනය කළේය.
මියගිය පිරිස අතර ඉන්දීය සහ පාකිස්තාන ජාතිකයින් සිටින බව තහවුරු වී ඇත. තුවාල ලැබූ 66 දෙනා මේ වන විට රෝහල්ගතව ප්රතිකාර ලබන අතර, ඔවුන් කිසිවෙකුගේ තත්ත්වය ජීවිත තර්ජනාත්මක නොවන බව අමාත්යවරයා සඳහන් කළේය.
මෙම සිදුවීම හදිසි අනතුරක් මිස කඩාකප්පල්කාරී ක්රියාවක් නොවන බව බලධාරීන් අවධාරණය කරයි. මෙම පිපිරීම හේතුවෙන් රටේ ගෑස් අපනයන කටයුතුවලට බාධාවක් සිදු නොවන බව ද අමාත්යවරයා වැඩිදුරටත් පැවසීය.
රාස් ලෆාන් කාර්මික කලාපයේ පිහිටි මෙම ගෑස් කම්හල කටාර් රාජ්යයේ දේශීය විදුලි උත්පාදනය සහ ජල ලවණ ඉවත් කිරීමේ කටයුතු සඳහා ප්රධාන වශයෙන් දායක වේ. කම්හලේ බහුතර කොටස් හිමිකාරීත්වය කටාර් රාජ්ය සතු වන අතර, සුළු කොටසක් එක්සොන් මොබිල් සමාගම සතු වේ.
සිද්ධිය සම්බන්ධයෙන් වැඩිදුර පරීක්ෂණ ක්රියාත්මක අතර, මියගිය පිරිස වෙනුවෙන් බලධාරීන් සිය ශෝකය පළ කර තිබේ.
