දකුණු ආසියාවේ සිවිල් ලියාපදිංචි කිරීමේ සහ වැදගත් සංඛ්යාලේඛන (CRVS) පද්ධති ශක්තිමත් කිරීමේ අරමුණින් සංවිධානය කෙරෙන තෙදින කලාපීය සමුළුව (CR8) කොළඹ ගෝල්ෆේස් හෝටල් පරිශ්රයේදී ආරම්භ විය. රාජ්ය පරිපාලන, පළාත් සභා සහ පළාත් පාලන අමාත්ය මහාචාර්ය චන්දන අබයරත්න මහතාගේ ප්රධානත්වයෙන් මෙම සමුළුව පැවැත්වේ.
මෙහිදී අදහස් දැක්වූ අමාත්යවරයා අවධාරණය කළේ, සිවිල් ලියාපදිංචිය යනු හුදෙක් මහජන සේවාවක් පමණක් නොව එය යහපත් පාලනයක පදනම බවයි. සෑම පුද්ගලයෙකුටම නීත්යානුකූල අනන්යතාවයක් ලබාදීම මගින් අධ්යාපන, සෞඛ්ය සහ මූල්ය සේවා වැනි අත්යවශ්ය පොදු සේවාවන් වෙත ප්රවේශ වීමේ පහසුව සැලසෙන බව ඔහු පෙන්වා දුන්නේය.
ශ්රී ලංකාව මේ වන විට ‘එක් ලේඛනාගාරයක්’ (One Registry) වැඩසටහන හරහා සිය ලියාපදිංචි පද්ධතිය ඩිජිටල්කරණය කිරීමට පියවර ගෙන ඇත. එක්සත් ජාතීන්ගේ ආර්ථික හා සමාජ කොමිසම (ESCAP), යුනිසෙෆ් සහ වයිටල් ස්ට්රැටජීස් ආයතනවල සහයෝගයෙන් මෙම සමුළුව සංවිධානය කර තිබේ.
මෙම සමුළුව සඳහා ඇෆ්ගනිස්ථානය, බංග්ලාදේශය, භූතානය, ඉන්දියාව, මාලදිවයින, නේපාලය, පකිස්ථානය සහ ශ්රී ලංකාව යන රටවල නියෝජිතයින් සහ ජාත්යන්තර සංවිධානවල බලධාරීන් එක්ව සිටිති. ජූලි 15 දක්වා පැවැත්වෙන මෙම සමුළුව අවසානයේ කලාපීය සිවිල් ලියාපදිංචි පද්ධති වැඩිදියුණු කිරීම සඳහා වන නිර්දේශ ඇතුළත් වාර්තාවක් නිකුත් කිරීමට නියමිතය.
