එංගලන්තයේ උපදින සෑම ළදරුවෙකුම ඉදිරි වසරේ සිට දුර්ලභ මාංශ පේශි ක්ෂය වීමේ රෝගයක් (SMA) සඳහා පරීක්ෂාවට ලක් කිරීමට එරට සෞඛ්ය හා සමාජ සත්කාර දෙපාර්තමේන්තුව පියවර ගෙන තිබේ. මෙම පියවර ගනු ලබන්නේ රෝගය මුල් අවස්ථාවේදීම හඳුනාගෙන දරුවාගේ ජීවිතය ආරක්ෂා කර ගැනීමේ අරමුණෙනි.
කොඳු ඇට පෙළේ මාංශ පේශි ක්ෂය වීමේ රෝගය හේතුවෙන් දරුවන්ට වාඩි වීමට, බඩගා යාමට හෝ ඇවිදීමට නොහැකි වීම වැනි බරපතළ ශාරීරික දුර්වලතා ඇති වේ. මීට අමතරව හුස්ම ගැනීමේ සහ ආහාර ගිලීමේ ගැටලු ද මතු විය හැකි අතර, නිසි ප්රතිකාර නොලැබුණහොත් වසර දෙකක් වැනි කෙටි කාලයක් තුළ දරුවා මරණයට පත්වීමේ අවදානමක් පවතී.
මෙම රෝගය දස දහසකින් එක් අයෙකුට පමණ බලපාන බව වෛද්ය වාර්තා පෙන්වා දෙයි. එක්සත් රාජධානියේ ස්පිනල් මාංශ පේශි ඇට්රොෆි සංවිධානයේ ප්රධාන විධායක නිලධාරී ගයිල්ස් ලොමැක්ස් පවසන්නේ, මෙම පරීක්ෂණ වැඩසටහන දහස් ගණනක් දරුවන්ගේ ජීවිත වෙනස් කිරීමට ඉවහල් වන වැදගත් පියවරක් බවයි.
පසුගිය අප්රේල් මාසයේ ආරම්භ කළ නියමු වැඩසටහනක සාර්ථකත්වය මත මෙම තීරණය ගෙන ඇති අතර, ඔක්තෝබර් මාසයේ සිට අලුත උපන් බිළිඳුන්ගෙන් බහුතරයක් මෙම පරීක්ෂණයට භාජනය කිරීමට නියමිතය. රෝගය කල්තියා හඳුනා ගැනීම මගින් දරුවන්ට අවශ්ය ප්රතිකාර කඩිනමින් ලබා දී ඔවුන්ගේ අනාගතය සුරක්ෂිත කිරීමට හැකි වනු ඇතැයි බලධාරීහු බලාපොරොත්තු වෙති.
