ජීවිතය ගැන කලකිරී සිරුරුවලට ගිනි තබාගත් නිවුන් සොහොයුරියන් දෙදෙනෙකු මියයයි

යාපනය, චුන්නාකම්, පුන්නලායීකඩ්ඩුවාන් ප්‍රදේශයේදී අතිශය ශෝචනීය පුවතක් වාර්තා වේ. ජීවිතය පිළිබඳ කලකිරීමට පත්වූ 18 හැවිරිදි නිවුන් සොහොයුරියන් දෙදෙනෙකු තමන්ගේ සිරුරුවලට ගිනි තබාගෙන තිබේ.

නිවසේ කිසිවෙකු නොමැති අවස්ථාවක මෙම තරුණියන් දෙදෙනා මෙම අවාසනාවන්ත තීරණය ගෙන ඇති බව වාර්තා වේ. ගින්නෙන් දැවෙමින් සිටියදී ඔවුන් මතු කළ හඬ ඇසී අසල්වාසීන් වහාම මැදිහත් වී ඔවුන් බේරාගෙන තෙලිප්පලෙයි රෝහලට ඇතුළත් කර ඇත.

පසුව තත්ත්වය බරපතළ වීම හේතුවෙන් ඔවුන් යාපනය ශික්ෂණ රෝහල වෙත මාරු කර යවා තිබේ. එහිදී ප්‍රතිකාර ලබමින් සිටියදී මෙම සොහොයුරියන් දෙදෙනා මියගොස් ඇත.

රෝහල්ගතව සිටියදී පොලිසිය වෙත ලබාදුන් ප්‍රකාශයකින් ඔවුන් පවසා ඇත්තේ තමන් ජීවිතය පිළිබඳ කලකිරීමට පත්වීම නිසා මෙම තීරණය ගත් බවයි. මනීපායී පොලිසිය සිද්ධිය සම්බන්ධයෙන් වැඩිදුර විමර්ශන සිදු කරයි.