මෙරට මාර්ග අනතුරු සම්බන්ධයෙන් අතිශය කනගාටුදායක තොරතුරු වාර්තා වී තිබේ. මාර්ග ආරක්ෂාව පිළිබඳ ජාතික සභාව පෙන්වා දෙන්නේ, වර්තමානයේ මාර්ග අනතුරුවලින් සිදුවන මරණවලින් වැඩිම ප්රතිශතයක් යතුරුපැදි අනතුරු හේතුවෙන් සිදුවන බවයි.
රථවාහන පාලන හා මාර්ග ආරක්ෂාව පොලිස් කොට්ඨාසයේ දත්තවලට අනුව, මේ වසරේ ජනවාරි 01 වනදා සිට ජූලි 31 වනදා දක්වා කාලය තුළ පමණක් අනතුරු 1,626ක් වාර්තා වී ඇත. පසුගිය වසරේ එම කාලසීමාව තුළ වාර්තා වූ අනතුරු 1,585ක අගයට සාපේක්ෂව මෙය ඉහළ යාමකි.
මෙම කාලසීමාව තුළ යතුරුපැදිකරුවන් 749 දෙනෙකු සිය ජීවිතවලින් වන්දි ගෙවා ඇති බව ජ්යෙෂ්ඨ පොලිස් අධිකාරී මනෝජ් රණගල මහතා සඳහන් කළේය. මාර්ග අනතුරුවලින් සිදුවන මරණවලට ප්රධාන හේතුව හිසට සිදුවන බරපතල තුවාල බව වෛද්ය හා ආරක්ෂක අංශ පෙන්වා දෙයි.
මේ සම්බන්ධයෙන් අදහස් දැක්වූ මාර්ග ආරක්ෂාව පිළිබඳ ජාතික සභාවේ සභාපති මංජුල කුලරත්න මහතා අවධාරණය කළේ, යතුරුපැදිකරුවන් නිරන්තරයෙන් නිසි ප්රමිතියෙන් යුත් ආරක්ෂිත හිස්වැසුමක් පැළඳීම අනිවාර්ය බවයි. විශේෂයෙන්ම SLS ලාංඡනය සහිත හිස්වැසුම් භාවිත කිරීම තුළින් අනතුරකදී සිදුවන හානිය අවම කරගත හැකි බව ඔහු වැඩිදුරටත් පැවසීය.
මෙම තත්ත්වය පාලනය කිරීම සඳහා ජාත්යන්තර ප්රමිති ආයතනය, පාරිභෝගික සේවා අධිකාරිය සහ ශ්රී ලංකා පොලීසිය එක්ව දිවයින පුරා ක්රියාත්මක වන පරිදි විශේෂ වැඩපිළිවෙලක් දියත් කරමින් පවතී. සිය සහ අන් අයගේ ආරක්ෂාව වෙනුවෙන් නීතිගරුකව සහ ආරක්ෂිතව මාර්ගයේ ගමන් කරන ලෙස රියදුරන්ගෙන් ඉල්ලා සිටී.
