තායිලන්තයේ පවතින ශ්රම හිඟය පියවා ගැනීම සඳහා ශ්රී ලාංකික ශ්රමිකයන් 10,000ක් බඳවා ගැනීමට තායිලන්ත කැබිනට් මණ්ඩලය අනුමැතිය ලබා දී තිබේ. ඒ අනුව, දෙරට අතර කම්කරු සහයෝගීතාව ශක්තිමත් කිරීම අරමුණු කරගනිමින් විශේෂ ගිවිසුම් දෙකකට පසුගියදා අත්සන් තැබිණි.
විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා සහ තායිලන්ත කම්කරු අමාත්ය ජුලාපන් අමෝර්න්විවත් මහතා විසින් මෙම ගිවිසුම්වලට අත්සන් තැබූහ. කම්කරු සහයෝගීතාව පිළිබඳ අවබෝධතා ගිවිසුම (MoU) සහ තායිලන්තයේ ශ්රී ලාංකික ශ්රමිකයන් සේවයේ යෙදවීම පිළිබඳ ගිවිසුම (MoA) මගින් ශ්රමිකයන් බඳවා ගැනීමේ විනිවිද පෙනෙන ක්රමවේදයක් ස්ථාපිත කෙරේ.
මෙම නව වැඩපිළිවෙළ යටතේ සේවයට එක්වන ශ්රී ලාංකිකයන්ට තායිලන්ත කම්කරු නීතිය යටතේ නීත්යානුකූල වැටුප්, සෞඛ්ය පහසුකම් සහ සමාජ ආරක්ෂණය හිමිවන බව තායිලන්ත බලධාරීන් සහතික කරයි. මිනිස් ජාවාරම් වැළැක්වීම සහ ශ්රමිකයන්ගේ අයිතිවාසිකම් සුරැකීම මෙම ගිවිසුම්වල ප්රධාන අරමුණකි.
අමාත්ය විජිත හේරත් මහතා මෙහිදී අවධාරණය කළේ, මෙම ගිවිසුම් ක්රියාත්මක කිරීම අධීක්ෂණය කිරීම සඳහා ඒකාබද්ධ ක්රියාකාරී කමිටුවක් පත් කිරීමේ වැදගත්කමයි. එමෙන්ම තොරතුරු තාක්ෂණ සහ සංචාරක ක්ෂේත්රවල රැකියා අවස්ථා තරුණ ප්රජාව වෙනුවෙන් පුළුල් කරන ලෙසද අමාත්යවරයා තායි රජයෙන් ඉල්ලා සිටියේය.
ශ්රී ලංකාව සිය විදේශ රැකියා ගමනාන්ත විවිධාංගීකරණය කිරීමේ වැඩපිළිවෙළ යටතේ අග්නිදිග ආසියානු කලාපය කෙරෙහි වැඩි අවධානයක් යොමු කර ඇත. සංස්කෘතික සමානකම් හේතුවෙන් ශ්රී ලාංකිකයන්ට මෙම නව සේවා පරිසරයට පහසුවෙන් හැඩගැසිය හැකි වනු ඇතැයි අපේක්ෂා කෙරේ.
