ශ්‍රී ලංකා මහ බැංකුව විසින් වාර්ෂිකව සම්පාදනය කරනු ලබන ‘ශ්‍රී ලංකා සමාජ-ආර්ථික දත්ත 2026’ ප්‍රකාශනය මේ වන විට එළිදක්වා ඇත. මෙය මෙම දත්ත මාලාවේ 49 වැනි වෙළුම ලෙස ප්‍රකාශයට පත් කර තිබේ.
මෙම අත්පොතෙහි රටේ සමස්ත ආර්ථිකය, මානව සම්පත්, කෘෂිකර්මාන්තය, කර්මාන්ත, ජාතික ගිණුම්, රාජ්‍ය මූල්‍ය සහ බැංකු ක්ෂේත්‍රය ඇතුළු අංශ 14ක් යටතේ වැදගත් දත්ත රැසක් ඇතුළත් වේ. කෙටි සහ සාරාංශගත ආකාරයෙන් සකස් කර ඇති මෙම වාර්තාව ප්‍රතිපත්ති සම්පාදකයින්, පර්යේෂකයින්, සිසුන් සහ උනන්දුවක් දක්වන ඕනෑම අයෙකුට ඉතා වැදගත් වනු ඇත.
මෙම ප්‍රකාශනයේ විද්‍යුත් පිටපත ශ්‍රී ලංකා මහ බැංකුවේ නිල වෙබ් අඩවිය හරහා නොමිලේ ලබා ගත හැකිය. මීට අමතරව, මුද්‍රිත පිටපතක් රුපියල් 100ක මිලකට කොළඹ 01, චැතම් වීදියේ පිහිටි මහ බැංකු මූලස්ථාන ගොඩනැගිල්ලේ පිහිටි අලෙවි කවුන්ටරයෙන් මිලදී ගැනීමේ අවස්ථාව පවතී.
වැඩිදුර තොරතුරු සඳහා 011-2444502 යන දුරකථන අංකය ඔස්සේ මහ බැංකුවේ අලෙවි අංශය ඇමතිය හැකිය.
