ශ්‍රී ලංකා පාර්ලිමේන්තු ඉතිහාසයේ වැදගත් පියවරක් තබමින්, පාර්ලිමේන්තුවේ අභිනව භාෂා පරිවර්තන ඒකකය පසුගිය ඔක්තෝබර් 05 වැනිදා නිල වශයෙන් විවෘත කෙරිණි. පාර්ලිමේන්තු මහ ලේකම් කුෂානි රෝහණදීර මහත්මියගේ ප්‍රධානත්වයෙන් මෙම ඒකකය විවෘත වූ අතර, එහි අරමුණ වන්නේ පාර්ලිමේන්තුවේ ලිඛිත පරිවර්තන කටයුතු වඩාත් විධිමත් හා කාර්යක්ෂම කිරීමයි.
මෙම අවස්ථාවේදී අදහස් දැක්වූ මහ ලේකම්වරිය සඳහන් කළේ, පාර්ලිමේන්තුවේ වටිනාම සම්පත එහි කාර්ය මණ්ඩලය බවත්, ඔවුන්ගේ වෘත්තීය ස්ථාවරභාවය සහ අභිවෘද්ධිය වෙනුවෙන් පාර්ලිමේන්තු ලේකම් මණ්ඩලය සැමවිටම කැපවී සිටින බවත්ය. භාෂා පරිවර්තකයන් මෙන්ම කථා පරිවර්තකයන් ද මෙම කාර්යයේදී ඉටුකරන සක්‍රීය දායකත්වය ඇය මෙහිදී ඇගයීමට ලක් කළාය.
පාර්ලිමේන්තුවේ ව්‍යවස්ථාදායක සේවා අධ්‍යක්ෂ ජයලත් පෙරේරා මහතා පැවසුවේ, පරිවර්තන කටයුතු සම්බන්ධයෙන් මෙතෙක් කිසිදු අංශයකින් පැමිණිල්ලක් ලැබී නොමැති බවයි. මෙම නව ඒකකය ස්ථාපිත කිරීමේ සංකල්පය ප්‍රධාන පාර්ලිමේන්තු කථා පරිවර්තක සී. ජේ. කරුණාරත්න මහතා විසින් ඉදිරිපත් කර තිබූ අතර, ඒ සඳහා අවශ්‍ය භෞතික පහසුකම් සහ පුහුණු අවස්ථා ලබාදීමට පාර්ලිමේන්තු පරිපාලනය පූර්ණ සහයෝගය ලබා දී ඇත.
මෙම උත්සවයට සමගාමීව 2026 ජාත්‍යන්තර භාෂා පරිවර්තන දිනය සැමරීම ද සිදු කෙරිණි. එහිදී භාෂා පරිවර්තකයන්ගේ තේමා ගීතය එළිදැක්වීම, වෘත්තීය ආචාරධර්ම සංග්‍රහය පිළිගැන්වීම සහ නවක නිලධාරීන් සඳහා සහතිකපත් ප්‍රදානය කිරීම ද සිදු විය. පාර්ලිමේන්තු කථා පරිවර්තන සේවාවට වසර ගණනාවක් දායක වූ හිටපු නිලධාරීන් ද මෙහිදී විශේෂ ඇගයීමට ලක් කෙරිණි.
