ප්‍රකට බොලිවුඩ් සිනමා නළු ටයිගර් ෂෙරොෆ් ගමන් කරමින් සිටි මෝටර් රථයට මුම්බායිහි ජුහු ප්‍රදේශයේදී ඊයේ (18) සවස වෙඩි ප්‍රහාරයක් එල්ල වී තිබේ. පාපන්දු ක්‍රීඩාවක නිරත වී ආපසු නිවස බලා යමින් සිටියදී පුෂ්පා පාර්ක් ප්‍රදේශය ආසන්නයේදී මෙම ප්‍රහාරය සිදුව ඇත.
යතුරුපැදියකින් පැමිණි පිරිසක් විසින් මෙම වෙඩි තැබීම සිදුකර පලාගොස් ඇති බව ඉන්දීය මාධ්‍ය වාර්තා කරයි. වාසනාවකට මෙන් නළු ටයිගර් ෂෙරොෆ්ට කිසිදු හානියක් සිදුව නොමැති අතර, ඔහුගේ රියැදුරු සහ තවත් අයෙකු තුවාල ලබා රෝහල්ගත කර තිබේ.
සිද්ධිය සම්බන්ධයෙන් මුම්බායි පොලිසිය විසින් විශේෂ විමර්ශනයක් ආරම්භ කර ඇත. සැකකරුවන් අත්අඩංගුවට ගැනීම සඳහා විශේෂ පොලිස් කණ්ඩායම් යොදවා ඇති අතර, ප්‍රදේශයේ සීසීටීවී දර්ශන ඔස්සේ වැඩිදුර පරීක්ෂණ සිදුකරමින් පවතී.
මහාරාෂ්ට්‍ර ප්‍රාන්තයේ ස්වදේශ කටයුතු අමාත්‍ය දේවේන්ද්‍ර ෆඩ්නවිස් මහතා ද සිද්ධිය සම්බන්ධයෙන් පොලිස් බලධාරීන් සමඟ සාකච්ඡා කර ඇත. වෙඩි තැබීමට හේතුව මෙතෙක් අනාවරණය වී නොමැති අතර, සමාජ මාධ්‍ය ඔස්සේ අපරාධ කණ්ඩායමක් විසින් වගකීම භාරගනිමින් පළකර ඇති ප්‍රකාශයක සත්‍යතාව පිළිබඳව ද පොලිසියේ අවධානය යොමුව තිබේ.
