බෙංගාල බොක්ක මුහුදු ප්‍රදේශයේ වර්ධනය වී ඇති ‘අර්නබ්’ (Arnab) සුළි කුණාටුව හේතුවෙන් ගැඹුරු මුහුදේ ධීවර කටයුතුවල නිරත ශ්‍රී ලාංකික ධීවරයින් දැඩි අවදානමකට ලක්ව ඇත. මෙම සුළි කුණාටුව ඔක්තෝබර් 28 වන දින ඉන්දියාවේ ආන්ද්‍රා ප්‍රදේශ් වෙරළ තීරයෙන් ගොඩබිමට ඇතුළු වනු ඇතැයි කාලගුණ විද්‍යා දෙපාර්තමේන්තුව අනාවරණය කරයි.
පවතින අයහපත් කාලගුණික තත්ත්වය හමුවේ ඉන්දියාවට ආසන්න මුහුදු සීමාවේ බහුදින ධීවර යාත්‍රා 25ක් පමණ රැඳී සිටින බව ධීවර හා ජලජ සම්පත් දෙපාර්තමේන්තුව තහවුරු කරයි. මෙම යාත්‍රාවලට යළි දිවයිනට පැමිණීමට ඇති බාධා සැලකිල්ලට ගනිමින් ධීවර අමාත්‍යාංශය කඩිනම් රාජ්‍ය තාන්ත්‍රික පියවර ගෙන තිබේ.
ඒ අනුව, ශ්‍රී ලංකාවේ ඉන්දීය මහකොමසාරිස් කාර්යාලය හරහා ඉන්දීය රජයෙන් කරන ලද ඉල්ලීමකට අනුව, එම යාත්‍රාවලට ආරක්ෂාව සඳහා ඉන්දීය දේශසීමාවට ඇතුළු වීමට අවසර ලබා දී ඇත. අදාළ යාත්‍රා හිමිකරුවන්ට මේ වන විටත් අනුගමනය කළ යුතු ආරක්ෂිත ක්‍රියාපටිපාටි පිළිබඳව නිල වශයෙන් දැනුම් දී තිබේ.
කාලගුණ විද්‍යා දෙපාර්තමේන්තුව අවධාරණය කරන්නේ උතුරු අක්ෂාංශ 10 – 20 සහ නැගෙනහිර දේශාංශ 80 – 95 අතර මුහුදු ප්‍රදේශවල සුළගේ වේගය පැයට කිලෝමීටර් 140ක් දක්වා ඉහළ යා හැකි බවයි. එම නිසා, එම කලාපවලින් වහාම ඉවත්ව ආරක්ෂිත ස්ථාන වෙත ගමන් කරන ලෙසත්, ඉදිරියේදී නිකුත් කෙරෙන කාලගුණික නිවේදන පිළිබඳව දැඩි අවධානයෙන් පසුවන ලෙසත් ධීවර ප්‍රජාවගෙන් ඉල්ලා සිටී.
