ඇමරිකාවේ ෆ්ලොරිඩා ප්‍රාන්තයේ ෆෝට් පියර්ස් (Fort Pierce) ප්‍රදේශයේ පවතින දැඩි ගංවතුර තත්ත්වය අතරතුර, ජලයෙන් යටවූ මාර්ගයක මෝරෙකුට සමාන සත්වයෙකු ගමන් කරන දර්ශන පෙළක් සමාජ මාධ්‍ය ඔස්සේ ප්‍රචාරය වෙමින් පවතී. මෙම වීඩියෝව තුළ ගංවතුරේ ගමන් කරන වාහන සහ වැසි ආරක්ෂක ඇඳුම් පැළඳ සිටින පිරිසක් අසලින් අඳුරු පැහැති, වරලක් සහිත සත්වයෙකු ජලය තුළින් ගමන් කරන ආකාරය දැකගත හැකිය.
කෙසේ වෙතත්, වීඩියෝවේ දැක්වෙන සත්වයා සැබවින්ම මෝරෙකු දැයි මෙතෙක් ස්වාධීනව තහවුරු කර නොමැත. මෙය වෙනත් විශාල මත්ස්‍යයෙකු හෝ ජලයේ පාවෙන වෙනත් වස්තුවක් විය හැකි බවට විවිධ අදහස් පළවෙමින් පවතී.
ෆ්ලොරිඩා ප්‍රදේශයේ බහුලව දක්නට ලැබෙන ‘බුල් ෂාක්’ (Bull Shark) නමැති මෝර විශේෂයට කරදිය මෙන්ම මිරිදිය ජලයේ ද ජීවත් වීමේ හැකියාව පවතී. ඔවුන්ට ගංගා සහ මෝය මාර්ග ඔස්සේ රට අභ්‍යන්තරයට පිවිසීමේ හැකියාව තිබුණද, මෙම වීඩියෝවේ දැක්වෙන්නේ එවැනි මෝරෙකු බවට තහවුරු කිරීමට ප්‍රමාණවත් සාක්ෂි නොමැති බව විශේෂඥයෝ පවසති.
පසුගිය නොවැම්බර් මස මුල් සතියේ ඇදහැළුණු අධික වර්ෂාව හේතුවෙන් ෆ්ලොරිඩාවේ ප්‍රදේශ රැසක් ජලයෙන් යටවී තිබේ. තත්ත්වය පාලනය කිරීම සඳහා ආණ්ඩුකාර රොන් ඩිසැන්ටිස් විසින් ප්‍රාන්ත හතක් සඳහා හදිසි තත්ත්වයක් ප්‍රකාශයට පත් කර ඇති අතර, මේ වනවිටත් විශාල පිරිසක් ආරක්ෂිත ස්ථාන වෙත යොමු කිරීමට බලධාරීන් පියවර ගෙන ඇත.
