පසුගිය දිනවල සමාජ මාධ්ය ඔස්සේ සංසරණය වූ අතිශය සංවේදී වීඩියෝවක් හේතුවෙන් රටම කම්පනයට පත්විය. කරන්දෙණියේ පදිංචි දිනේෂ් විජේවර්ධන නම් තරුණයෙකු මුහුණු පොත ඔස්සේ සජීවීව සියදිවි නසා ගැනීම සම්බන්ධයෙන් විවිධ මත පළවෙමින් තිබේ.
මෙම සිදුවීම සම්බන්ධයෙන් අසත්ය තොරතුරු සමාජගත වෙමින් පවතින පසුබිමක, මියගිය තරුණයාගේ සමීපතම මිතුරෙකු විසින් ඒ පිළිබඳ සැබෑ තොරතුරු අනාවරණය කරමින් සටහනක් තබා ඇත. එම මිතුරා පවසන පරිදි, මියගිය තරුණයා විදේශගතව සිටියදී විවිධ පුද්ගලික ගැටලු සහ පවුල් ආරවුල් හේතුවෙන් දැඩි මානසික පීඩනයකින් පසුවී තිබේ.
ඔහුගේ මිතුරා වැඩිදුරටත් සඳහන් කරන්නේ, මියගිය තරුණයා මත්පැන් සහ සූදුවට ඇබ්බැහි වී සිටීම නිසා ඔහුගේ පවුල් ජීවිතය සහ රැකියාව අහිමිවී ගිය බවයි. කොරියාවේ රැකියාවක නිරතව සිටියදී ඇතිවූ ගැටලු හේතුවෙන් ඔහු නැවත මෙරටට පැමිණ ඇති අතර, පසුව ඇතිවූ ආර්ථික හා මානසික පීඩනයන් මත ඔහු මෙම අවාසනාවන්ත තීරණය ගෙන ඇති බව එම මිතුරා පෙන්වා දෙයි.
මෙම සිදුවීම සම්බන්ධයෙන් මියගිය තරුණයාගේ පවුලේ සාමාජිකයන්ට සමාජ මාධ්ය ඔස්සේ එල්ලවන අසත්ය චෝදනා සහ අපහාස කිරීම් නතර කරන ලෙසත්, සිදුවීමක දෙපැත්තක් ඇති බවත් ඔහු අවධාරණය කරයි.
කෙසේ වෙතත්, පොලිසිය විසින් මෙම මරණය සම්බන්ධයෙන් නිල වශයෙන් කිසිදු කරුණක් මෙතෙක් ප්රකාශ කර නොමැත. ඕනෑම ගැටලුවකට විසඳුමක් සෙවීමට ජීවිතය පරදුවට තැබීම කිසිසේත්ම අනුමත කළ නොහැකි බවත්, තමන්ගේ ජීවිතය වටිනා බවත් එම මිතුරා සිය සටහන අවසන් කරමින් පවසා ඇත.
