ලොව වියළිම සහ උණුසුම්ම කලාපවල ජීවත් වන ඔටුවන් දේශගුණික විපර්යාසවල සෘජු ගොදුරු බවට පත්වෙමින් සිටින බව නවතම පර්යේෂණ වාර්තා පෙන්වා දෙයි. සාමාන්යයෙන් සෙල්සියස් අංශක 40ක් වැනි උෂ්ණත්වයකට සාර්ථකව මුහුණ දීමේ හැකියාව ඔවුන් සතු වුවද, වර්තමානයේ පවතින අංශක 50 ඉක්මවූ උෂ්ණත්වය ඔවුන්ගේ ශරීර ක්රියාකාරීත්වයට දැඩි බලපෑමක් එල්ල කර තිබේ.
ඉතියෝපියාවේ අෆාර් කලාපයේ ඔටුවන් ඇතිකරන ගොවීන් පවසන්නේ පසුගිය කාලය තුළ උෂ්ණත්වය ඉහළ යාම නිසා සතුන්ගේ පාදවල බිබිලි මතුවීම, ඇස්වලින් කඳුළු ගැලීම සහ සමට හානි සිදුවීම වැනි ගැටලු උග්ර වී ඇති බවයි. මෙම තත්ත්වය හේතුවෙන් ඔටු පැටවුන් මියයාමේ ප්රවණතාවක්ද දක්නට ලැබේ.
විශේෂඥයන් පෙන්වා දෙන පරිදි, අධික උණුසුම නිසා ඔටුවන් අතර විජලනය, ශාරීරික වෙහෙස සහ විවිධ ආසාදන පැතිරීමේ අවදානම ඉහළ ගොස් ඇත. මෙහි ප්රතිඵලයක් ලෙස ඔවුන්ගේ කිරි නිෂ්පාදනය සහ ප්රජනන හැකියාව සැලකිය යුතු ලෙස පහත වැටී ඇති බව අධ්යයනවලින් තහවුරු වී තිබේ.
උතුරු අප්රිකාව සහ අප්රිකාවේ හෝර්න් කලාපය තුළ සිදුකළ සමීක්ෂණවලට අනුව, නියඟය සහ උෂ්ණත්වය හේතුවෙන් ඔටුවන් ඇතිකරන පවුල් විශාල සංඛ්යාවක් සිය ජීවිකාව පවත්වා ගැනීමට දැඩි අරගලයක නිරතව සිටිති. තණබිම් සහ ජල මූලාශ්ර අහිමිවීම නිසා බොහෝ ගොවීන් සිය සතුන් සමඟ දකුණු ප්රදේශ වෙත ස්ථිරවම සංක්රමණය වීමට පවා පියවර ගනිමින් සිටිති.
ලෝක කාලගුණ විද්යා සංවිධානයේ දත්තවලට අනුව, 1981 වසරේ සිට මෙම කලාපවල තාප තරංග නිරන්තරයෙන් ඉහළ යමින් පවතී. කාන්තාරයේ අවසන් බලාපොරොත්තුව ලෙස සැලකෙන ඔටුවන් පවා දේශගුණික විපර්යාස හමුවේ අසරණ වීම, ගෝලීය උෂ්ණත්වය ඉහළ යාමේ බරපතළකම පිළිබඳව ලෝකයටම කියාපාන අනතුරු ඇඟවීමකි.
