මීගමුව බන්ධනාගාරය තුළ පසුගිය ජූලි මාසයේදී ඇතිවූ නොසන්සුන්තාවය සම්බන්ධයෙන් මීගමුව මහේස්ත්රාත් ශිලනි පෙරේරා මහත්මිය විසින් අදාළ විමර්ශන කටයුතු කඩිනම් කරන ලෙස අපරාධ පරීක්ෂණ දෙපාර්තමේන්තුවට නියෝග කර තිබේ. මෙම සිද්ධිය සම්බන්ධයෙන් මේ වන විටත් බන්ධනාගාර නිලධාරීන්, රැඳවියන් සහ පොලිස් නිලධාරීන් ඇතුළු විශාල පිරිසකගෙන් ප්රකාශ සටහන් කරගෙන ඇත.
අධිකරණයේදී අනාවරණය වූ කරුණු අනුව, මෙම ගැටුම බන්ධනාගාරය තුළට මත්ද්රව්ය රැගෙන ඒම සම්බන්ධයෙන් තොරතුරු ලබාදුන් රැඳවියන් පිරිසක් ඉලක්ක කර ගනිමින් සංවිධානාත්මකව සිදුකරන ලද්දකි. සිද්ධියට අදාළව සැකකරුවන් 40 දෙනෙකුගේ අන්වර්ථ නාමයන් මේ වන විට හඳුනාගෙන ඇති අතර, ඔවුන්ගේ සැබෑ අනන්යතාවයන් තහවුරු කර ගැනීමට පරීක්ෂණ ක්රියාත්මකයි.
සිද්ධියෙන් මියගිය 28 දෙනෙකුගේ පශ්චාත් මරණ පරීක්ෂණ වාර්තා පදනම් කරගනිමින් මහේස්ත්රාත්වරිය මරණවලට හේතු ප්රකාශ කළාය. ඒ අනුව, ඉන් 17 දෙනෙකු වෙඩි තැබීම්වලින් සිදුවූ තුවාල හේතුවෙන්ද, අනෙක් 11 දෙනා මොට ආයුධවලින් සිදුවූ බහුවිධ තුවාල හේතුවෙන්ද මියගොස් ඇති බව තහවුරු විය.
මෙම සිද්ධිය පාලනය කිරීම සඳහා වැලිකඩ බන්ධනාගාර මූලස්ථානයෙන් පැමිණි විශේෂ බලකාය විසින් ගිනිඅවි 10ක් සහ පතොරම් රැගෙන විත් තිබූ බවත්, ඉන් පතොරම් 12ක් පමණක් වැය කර ඇති බවත් විමර්ශන නිලධාරීන් අධිකරණයට වාර්තා කළේය. අදාළ ගිනිඅවි සහ ඉතිරි පතොරම් මේ වන විට පොලිස් භාරයට ගෙන ඇත.
අගතියට පත් පාර්ශවය වෙනුවෙන් පෙනී සිටි නීතිඥවරයා අධිකරණයේදී කරුණු දක්වමින්, මෙම සිදුවීම තුළ නොසැලකිලිමත්කම නිසා මරණ සිදුවී ඇති බවත්, ඒ සම්බන්ධයෙන් දණ්ඩ නීති සංග්රහයේ අදාළ වගන්ති යටතේ විමර්ශන සිදුකළ යුතු බවත් අවධාරණය කළේය. සිද්ධියට අදාළ වැඩිදුර විමර්ශන තවදුරටත් ක්රියාත්මක වේ.
