ඊශ්රායල අග්රාමාත්ය බෙන්ජමින් නෙතන්යාහු විසින් බ්රිතාන්යයේ අනාගත දේශපාලන ගමන්මග සම්බන්ධයෙන් සිදුකළ ආන්දෝලනාත්මක ප්රකාශයක් මේ වන විට දැඩි කතාබහකට ලක්ව ඇත. හමුදා ගුවන්විදුලි වැඩසටහනකට එක්වෙමින් ඔහු පවසා ඇත්තේ බ්රිතාන්යය ඉදිරියේදී න්යෂ්ටික අවි සතු පළමු ඉස්ලාමීය ජනරජය බවට පත්වීමේ අවදානමක් පවතින බවයි.
ඊශ්රායලය සහ ඉරානය අතර පවතින න්යෂ්ටික ගැටුම් පිළිබඳ අදහස් දක්වමින් අග්රාමාත්යවරයා මෙම අදහස් පළ කළේය. බ්රිතාන්යයේ වර්තමාන සමාජ සහ දේශපාලන වෙනස්කම් විවේචනයට ලක් කළ නෙතන්යාහු, අතීතයේ බ්රිතාන්ය දේශපාලනඥයන් ඊශ්රායලය කෙරෙහි දැක්වූ සහයෝගය වර්තමානයේදී දක්නට නොමැති බව වැඩිදුරටත් සඳහන් කළේය.
දෙරට අතර රාජ්යතාන්ත්රික සබඳතා දැනටමත් යම් පීඩනයකට ලක්ව ඇති පසුබිමක මෙම ප්රකාශය නිකුත් වීම විශේෂත්වයකි. විශේෂයෙන්ම ගාසා යුද්ධය සහ පලස්තීන රාජ්යය සම්බන්ධයෙන් බ්රිතාන්යය ගෙන ඇති ස්ථාවරයන් දෙරට අතර මතභේදයට හේතු වී තිබේ.
මීට අමතරව, ඊශ්රායලයේ ඇතැම් අන්ත දක්ෂිණාංශික කැබිනට් සාමාජිකයන්ට එරෙහිව බ්රිතාන්යය විසින් සම්බාධක පැනවීමට කටයුතු කිරීම සහ නිදහස් වෙළෙඳ සාකච්ඡා අත්හිටුවීම වැනි කරුණු ද දෙරට අතර රාජ්යතාන්ත්රික අර්බුද උග්ර කර ඇත.
කෙසේ වෙතත්, නෙතන්යාහුගේ මෙම ප්රකාශය සම්බන්ධයෙන් විදෙස් මාධ්ය පෙන්වා දෙන්නේ එය බ්රිතාන්යයේ වර්තමාන තත්ත්වය පිළිබඳ ඔහුගේ පුද්ගලික දේශපාලන මතයක් පමණක් බවයි. මේ සම්බන්ධයෙන් ඊශ්රායලයේම විපක්ෂ දේශපාලනඥයන් පවා චෝදනා කර ඇත්තේ ජාත්යන්තර වශයෙන් හුදකලා වෙමින් පවතින අවස්ථාවක මෙවැනි ප්රකාශ සිදුකිරීම රාජ්යතාන්ත්රික අසාර්ථකත්වයක් බවයි.
