ඕස්ට්රේලියාවේ දකුණු ප්රාන්තයේ වෙරළාසන්න ප්රදේශයකින් H5N1 කුරුළු උණ ආසාදනය වූ ක්ෂීරපායී සතෙකු පිළිබඳව පළමු වරට තහවුරු කර තිබේ. බීච්පෝර්ට් ප්රදේශයේ වෙරළක මියගොස් සිටි ලොම් සහිත සීල් මත්ස්යයෙකුගේ සිරුර පරීක්ෂා කිරීමේදී මෙම වෛරසය හඳුනාගෙන ඇත.
අදාළ සත්වයාගේ සිරුරේ බාහිර තුවාල කිසිවක් දක්නට නොතිබූ බව බලධාරීන් පවසයි. ඕස්ට්රේලියාවේ පශු වෛද්ය අංශ පෙන්වා දෙන්නේ, සීල් මත්ස්යයින් වල් පක්ෂීන් ගැවසෙන පාෂාණමය වෙරළ තීරයන්හි ජීවත් වන බැවින් ඔවුන්ට වෛරසය ආසාදනය වීමේ වැඩි අවදානමක් පවතින බවයි.
මේ වන විට ඕස්ට්රේලියාව පුරා කුරුළු උණ ආසාදිත අවස්ථා 297ක් පමණ වාර්තා වී ඇතත්, එරට කුකුළු කර්මාන්තයට හෝ කෘෂිකාර්මික අංශයට මෙතෙක් වෛරසයේ බලපෑමක් සිදුවී නොමැති බව ෆෙඩරල් රජය තහවුරු කරයි. කෙසේ වෙතත්, ස්වභාවික පරිසරය තුළ වෛරසය පැතිරීම හේතුවෙන් සත්ව හානි සිදුවීමේ අවදානමක් පවතින බව කෘෂිකර්ම අමාත්යවරිය අනතුරු අඟවයි.
මීට පෙර 2025 වසරේ අගභාගයේදී හර්ඩ් දූපතේදී ද මෙවැනි වෛරස් තත්ත්වයක් වාර්තා වූ අතර, එහිදී විශාල වශයෙන් සීල් පැටවුන් මියගිය බව වාර්තා විය. සෞඛ්ය අංශ මේ වන විට තත්ත්වය පිළිබඳව දැඩි අවධානයෙන් පසුවෙයි.
