ශ්‍රී ලංකාවේ අධිවේගී මාර්ගවල ධාවනය වන වාහනවල ආසන පටි (seatbelts) නිසි පරිදි නොපැළඳීම සම්බන්ධයෙන් රියදුරන් සහ මගීන් 3,000කට ආසන්න පිරිසකට එරෙහිව මේ වන විට නීතිමය පියවර ගෙන ඇති බව පොලිසිය පවසයි.
රථවාහන කළමනාකරණ සහ මාර්ග ආරක්ෂණ අංශය භාර නියෝජ්‍ය පොලිස්පති ඩබ්ලිව්. පී. ජේ. සේනාධීර මහතා සඳහන් කළේ, මෙම නීති ක්‍රියාත්මක කරනු ලබන්නේ රියදුරන්ට හෝ මගීන්ට දඬුවම් කිරීමේ අරමුණින් නොව, ඔවුන්ගේ ජීවිත ආරක්ෂා කිරීමේ පරමාර්ථයෙන් බවයි.
අධිවේගී මාර්ගවල වාහන පැයට කිලෝමීටර් 100ක පමණ වේගයෙන් ධාවනය වන බැවින්, හදිසි තිරිංග යෙදීමකදී හෝ අනතුරකදී ආසන පටි නොමැති වීමෙන් බරපතළ තුවාල සිදුවීමේ අවදානම ඉතා ඉහළය. මෑතකදී දක්ෂිණ අධිවේගී මාර්ගයේ වාහන 11ක් සම්බන්ධයෙන් සිදුවූ අනතුරකදී මගීන් ආසන පටි පැළඳ සිටීම හේතුවෙන් කිසිදු ජීවිත හානියක් සිදු නොවූ බව ඔහු පෙන්වා දුන්නේය.
එබැවින්, නීතියට බියෙන් පමණක් නොව තම ජීවිතයේ වටිනාකම සලකා සෑම විටම ආසන පටි පැළඳීමට වගබලා ගන්නා ලෙස පොලිසිය මහජනතාවගෙන් ඉල්ලා සිටී. ඉදිරියටත් මෙම නීතිය දැඩිව ක්‍රියාත්මක කරන බවත්, ඒ හරහා රිය අනතුරුවලින් සිදුවන හානි අවම කර ගැනීම අපේක්ෂා කරන බවත් බලධාරීහු වැඩිදුරටත් සඳහන් කරති.
