ඉන්දියාවේ ජම්මු සහ කාශ්මීර ප්‍රදේශයේ නීතිවිරෝධී ලෙස රැඳී සිටින බවට හඳුනාගත් බංග්ලාදේශ ජාතිකයන් 600 දෙනෙකු සම්බන්ධයෙන් බලධාරීන් විශේෂ පියවරක් ගෙන තිබේ. ඉන් පළමු අදියර යටතේ පුද්ගලයන් 150 දෙනෙකු මේ වන විට පිටුවහල් කර ඇති බව වාර්තා වේ.
පිටුවහල් කළ පිරිස ඉන්දීය ගුවන් හමුදාවට අයත් විශේෂ ගුවන් යානයකින් බටහිර බෙංගාලයේ බග්ඩෝග්‍රා වෙත රැගෙන ගොස් දේශසීමා ආරක්ෂක බලකාය වෙත භාර දී ඇත. මෙම පිරිස මීට පෙර ශ්‍රීනගර් පොලිසියේ අධීක්ෂණය යටතේ පවත්වාගෙන ගිය විශේෂ කඳවුරක රඳවා සිටි අය වෙති.
ප්‍රදේශයේ පරිපාලන බලධාරීන් සහ ජම්මු හා කාශ්මීර පොලිසිය එක්ව සිදුකළ දීර්ඝ සමීක්ෂණයකින් පසු මෙම නීතිවිරෝධී සංක්‍රමණිකයන් හඳුනාගෙන ඇත. ඉතිරි පිරිස ද ඉදිරි දිනවලදී පිටුවහල් කිරීමට නියමිත බව පොලිස් ආරංචි මාර්ග සඳහන් කරයි.
ඉන්දියාවේ දේශසීමා ආසන්න ප්‍රදේශවල නීතිවිරෝධී සංක්‍රමණිකයන් හඳුනාගැනීම සඳහා මධ්‍යම ස්වදේශ කටයුතු අමාත්‍යාංශය විසින් ඉහළ පෙළේ කමිටුවක් මීට පෙර පිහිටුවනු ලැබීය. විශ්‍රාමික විනිසුරුවරයෙකුගේ ප්‍රධානත්වයෙන් ක්‍රියාත්මක මෙම කමිටුව මගින් රටේ ජනගහන රටාවන්හි සිදුවන වෙනස්කම් සහ ඊට බලපාන හේතු පිළිබඳව පුළුල් අධ්‍යයනයක් සිදුකරමින් පවතී.
