මාලදිවයිනේ රැකියා සඳහා පැමිණෙන විදේශීය ශ්‍රමිකයින් සම්බන්ධයෙන් පවතින වීසා නීති පද්ධතිය යාවත්කාලීන කිරීමට එරට රජය තීරණය කර තිබේ. ව්‍යාපාරික වීසා සහ විශේෂ වීසා බලපත්‍ර අනිසි ලෙස භාවිතා කිරීම් හඳුනාගැනීමෙන් අනතුරුව මෙම පියවර ගෙන ඇති බව වාර්තා වේ.
නව සංශෝධනවලට අනුව, ව්‍යාපාරික හෝ විශේෂ වීසා බලපත්‍ර මත මාලදිවයිනට ඇතුළු වන විදේශිකයින්ට එරට රැඳී සිටිමින් රැකියා බලපත්‍ර සඳහා අයදුම් කිරීමට තවදුරටත් අවස්ථාව හිමි නොවේ. ස්වදේශ ආරක්ෂක, කම්කරු සහ තාක්ෂණ අමාත්‍යාංශය විසින් මෙම නීති ක්‍රියාත්මක කරනු ලබයි.
එසේම, මාලදිවයිනේ සේවය කරන සියලුම විදේශීය සේවකයින් සඳහා හැකි ඉක්මනින් බැංකු ගිණුම් විවෘත කරන ලෙස සේවායෝජකයින්ට උපදෙස් ලබා දී ඇත. මින් ඉදිරියට සේවකයින්ගේ වැටුප්, මාලදිවයින් මුදල් අධිකාරියේ ලියාපදිංචි බැංකුවක ඇති ඔවුන්ගේ පුද්ගලික ගිණුම් වෙතම බැර කළ යුතු බව අමාත්‍යාංශය අවධාරණය කරයි. කම්කරු සබඳතා අධිකාරිය විසින් නීතිමය කටයුතුවලදී වැටුප් ගෙවීමක් ලෙස පිළිගනු ලබන්නේ මෙම බැංකු ගිණුම් හරහා සිදුවන ගනුදෙනු පමණි.
රට තුළ නීති විරෝධී ලෙස රැඳී සිටින විදේශිකයින් සහ ඔවුන්ගේ සහය ඇතිව නීති විරෝධී ව්‍යාපාර පවත්වාගෙන යන පුද්ගලයින් හඳුනා ගැනීම සඳහා විශේෂ මෙහෙයුම් දියත් කර ඇත. නීති උල්ලංඝනය කරන ඕනෑම විදේශිකයෙකු ලබන වසරේ සිට රටින් පිටුවහල් කිරීමට බලධාරීන් තීරණය කර තිබේ.
