බොලිවුඩ් සිනමාවේ අතිශය ජනප්‍රිය රංගන ශිල්පීන් වන ෂාරුක් ඛාන් සහ දීපිකා පදුකෝන් යළිත් වරක් එකම චිත්‍රපටයකින් ප්‍රේක්ෂකයන් හමුවට පැමිණීමට සූදානම් වේ. ඔවුන් රංගනයෙන් දායක වන ‘කිං’ (King) චිත්‍රපටයේ විශේෂ ගීත අංගයක රූගත කිරීම් මෙම මස 26 වැනිදා මුම්බායි නුවරදී ආරම්භ කිරීමට නියමිත බව වාර්තා වේ.
මෙම ගීතයේ නර්තන අධ්‍යක්ෂණය ප්‍රවීණ නර්තන අධ්‍යක්ෂිකා වෛභවී මර්චන්ට් විසින් සිදු කරනු ලබයි. කෙසේ වෙතත්, චිත්‍රපට නිෂ්පාදක මණ්ඩලය විසින් ගීතයේ නම හෝ සංගීත අධ්‍යක්ෂවරයා පිළිබඳ තොරතුරු මෙතෙක් නිල වශයෙන් ප්‍රකාශයට පත් කර නොමැත.
ෂාරුක් සහ දීපිකා දශකයකට වැඩි කාලයක් පුරා බොලිවුඩයේ සාර්ථකම යුවළක් ලෙස කැපී පෙනේ. ඔවුන් පළමුවරට එකට රංගනයෙන් දායක වූයේ 2007 වසරේ තිරගත වූ ‘ඕම් ශාන්ති ඕම්’ චිත්‍රපටයෙනි. ඉන් අනතුරුව ‘චෙන්නායි එක්ස්ප්‍රස්’, ‘හැපි නිව් ඉයර්’, ‘පතාන්’ සහ ‘ජවාන්’ වැනි අතිශය ජනප්‍රිය චිත්‍රපට හරහා ඔවුන්ගේ සුසංයෝගය ප්‍රේක්ෂක ආදරය දිනා ගැනීමට සමත් විය.
පසුගිය කාලය පුරාම විවිධ චරිත ඔස්සේ ප්‍රේක්ෂකයන් මවිත කළ මෙම තරු යුවළ ‘කිං’ චිත්‍රපටය හරහා යළිත් එක්වීම ඔවුන්ගේ රසිකයන් අතර විශාල කතාබහකට ලක්ව තිබේ.
