ඉන්දීය ප්‍රිමියර් ලීග් තරගාවලියේ සන්රයිසස් හයිද්‍රාබාද් කණ්ඩායමේ හිමිකාරීත්වය දරන කාව්‍යා මාරන් සහ ප්‍රකට සංගීත අධ්‍යක්ෂවරයෙකු වන අනිරුද් රවිචන්දර් අතර විවාහයක් සිදුවීමට නියමිත බවට ඉන්දීය මාධ්‍ය වාර්තා කර තිබේ. මෙම පුවත මේ වන විට සමාජ මාධ්‍ය තුළ දැඩි කතාබහකට ලක්ව ඇත.
වාර්තා වන පරිදි, මෙම විවාහ මංගල උත්සවය 2026 නොවැම්බර් මාසයේදී පැවැත්වීමට සැලසුම් කර ඇති බව පැවසේ. ඇතැම් මාධ්‍ය වාර්තා සඳහන් කරන්නේ නොවැම්බර් 11 වන දින ග්‍රීසියේදී විවාහ උත්සවයත්, නොවැම්බර් 21 වන දින චෙන්නායිහිදී පිළිගැනීමේ උත්සවයත් පැවැත්වීමට නියමිත බවයි.
කෙසේ වෙතත්, මෙම විවාහ සැලසුම් සම්බන්ධයෙන් කාව්‍යා මාරන් හෝ අනිරුද් රවිචන්දර් විසින් මෙතෙක් කිසිදු නිල ප්‍රකාශයක් නිකුත් කර නොමැත. මීට පෙර 2025 වසරේදී ද මෙවැනිම කටකතා පැතිර ගිය ද, අනිරුද් විසින් ඒවා ප්‍රතික්ෂේප කර තිබුණි.
කාව්‍යා මාරන් ක්‍රිකට් ලෝලීන් අතර ප්‍රසිද්ධ චරිතයක් වන්නේ ඇයගේ කණ්ඩායමේ කළමනාකරණ කටයුතුවල නිරත වන ආකාරය හේතුවෙනි. අනිරුද් රවිචන්දර් දකුණු ඉන්දීය සිනමාවේ ජනප්‍රිය සංගීත අධ්‍යක්ෂවරයෙකු ලෙස ‘ජේලර්’, ‘ජවාන්’ සහ ‘ලියෝ’ වැනි චිත්‍රපට සඳහා සංගීතය සපයමින් ජාත්‍යන්තර කීර්තියක් දිනාගෙන සිටී.
මෙම විවාහය පිළිබඳ කටකතා නැවත කරළියට පැමිණියේ පසුගිය ජුනි මාසයේදී අනිරුද්ගේ මාමා වන නළු වයි. ජී. මහේන්ද්‍රන් සිදුකළ ප්‍රකාශයකින් පසුවය. කෙසේ වෙතත්, නිල තහවුරු කිරීමක් ලැබෙන තුරු මෙම තොරතුරු තවමත් කටකතා මට්ටමේ පවතින බව සඳහන් කළ යුතුය.
