ඉන්දියාවේ බටහිර බෙංගාල ප්‍රාන්තයේ කොල්කටා නගරයේ පැවති හින්දු ආගමික උත්සවයක් අතරතුර සිදුවූ තෙරපීමකින් පුද්ගලයින් 17 දෙනෙකු ජීවිතක්ෂයට පත්ව ඇති බව විදෙස් මාධ්‍ය වාර්තා කරයි.
වාර්ෂිකව පැවැත්වෙන දුර්ගා පූජා උත්සවය අතරතුර මෙම ඛේදවාචකය සිදුව ඇති අතර, එම අවස්ථාවේදී විශාල පිරිසක් උත්සව භූමියට එක්රොක් වී සිටි බව සඳහන් වේ.
මෙම අනතුරින් තවත් පුද්ගලයින් 25 දෙනෙකු පමණ තුවාල ලබා රෝහල්ගත කර තිබේ. තුවාල ලැබූවන්ගේ තත්ත්වය සම්බන්ධයෙන් මෙතෙක් වැඩිදුර තොරතුරු අනාවරණය වී නොමැත.
සිද්ධිය සම්බන්ධයෙන් ඉන්දීය අග්‍රාමාත්‍ය නරේන්ද්‍ර මෝදි සහ ස්වදේශ කටයුතු අමාත්‍යවරයා සිය බලවත් ශෝකය පළ කර ඇත. මියගිය අයගේ පවුල්වලට මූල්‍ය වන්දි ලබා දීමටත්, ඔවුන්ගේ පවුල්වල සාමාජිකයින්ට රජයේ රැකියා ලබා දීමටත් බටහිර බෙංගාල ප්‍රාන්ත රජය පියවර ගෙන තිබේ.
