දකුණු අප්‍රිකානු ටෙස්ට් ක්‍රිකට් කණ්ඩායමේ නායක ටෙම්බා බවුමා, ඔස්ට්‍රේලියාවට එරෙහිව පැවැත්වෙන දෙවැනි ටෙස්ට් තරගයේදී විශිෂ්ට ඉනිමක් ක්‍රීඩා කරමින් ජාත්‍යන්තර ක්‍රිකට් වාර්තා කිහිපයක්ම අලුත් කිරීමට සමත්විය. ග්කෙබෙර්හාහිදී පැවැත්වෙන මෙම තරගයේදී ඔහු ලකුණු 179ක් රැස් කළේය.
පවතින අයහපත් කාලගුණය සහ ඔස්ට්‍රේලියානු පන්දු යවන්නන්ගේ පීඩනය හමුවේ නොසැලී පන්දුවට පහරදුන් බවුමා, සෙසු පිතිකරුවන් සමඟ එක්ව දකුණු අප්‍රිකානු ඉනිම ශක්තිමත් කළේය. ඔහුගේ මෙම ඉනිම අවසන් වන විට දකුණු අප්‍රිකාව කඩුලු 9ක් දැවී ලකුණු 425ක් ලබා සිටියේය.
මෙම ඉනිමත් සමඟ ඔස්ට්‍රේලියාවට එරෙහිව ටෙස්ට් ඉනිමකදී ලකුණු 150ක් හෝ ඊට වැඩි සංඛ්‍යාවක් රැස් කළ වයස්ගතම නායකයා බවට බවුමා පත්විය. වයස අවුරුදු 36ක් සහ දින 154ක් ලෙස සටහන් වූ මෙම දස්කම මීට පෙර ඉන්දීය හිටපු නායක මොහොමඩ් අසරුදීන් සතුව තිබූ වාර්තාව අභිබවා යාමකි.
එමෙන්ම, වසර 1950දී ආතර් ලින්ඩ්සේ හැසට් පිහිටුවා තිබූ දකුණු අප්‍රිකාවේදී ටෙස්ට් ඉනිමකදී ලකුණු 150කට වඩා රැස් කළ වයස්ගතම නායකයා යන වාර්තාවද වසර 76කට පසු බවුමා විසින් බිඳ දමන ලදී. දකුණු අප්‍රිකානු නායකයෙකු තම මව්බිමේදී වාර්තා කළ සිව්වැනි ඉහළම ලකුණු සංඛ්‍යාව ලෙසද මෙම ඉනිම ඉතිහාසයට එක්වේ.
