ජපානය සහ ශ්‍රී ලංකාව අතර පවතින රාජ්‍ය තාන්ත්‍රික සබඳතාවලට 2027 වසරේදී වසර 75ක් සපිරේ. මෙම සුවිශේෂී සංවත්සරය සැමරීම සඳහා පැවැත්වෙන නිල වැඩසටහන්වල භාවිත කිරීමට සුදුසු ලාංඡනයක් (Logo) නිර්මාණය කිරීමට ජපාන විදේශ කටයුතු අමාත්‍යාංශය විසින් තරගයක් ප්‍රකාශයට පත් කර ඇත.
මෙම තරගය සඳහා ශ්‍රී ලාංකිකයන්ට මෙන්ම ජපාන පුරවැසියන්ටද වයස් සීමාවකින් තොරව සහභාගී විය හැකිය. ඉදිරිපත් කරන සෑම නිර්මාණයක්ම ස්වතන්ත්‍ර ඒවා විය යුතු අතර, කෘත්‍රිම බුද්ධි (Generative AI) තාක්ෂණය භාවිත කර නිර්මාණය කරන ලද ලාංඡන තරගයට පිළිගනු නොලැබේ.
සහභාගී වන්නන් තම නිර්මාණ JPEG, PDF හෝ EPS ආකෘතියෙන්, මෙගාබයිට් 3කට නොවැඩි ගොනු ප්‍රමාණයකින් සහ අවම වශයෙන් DPI 300ක විභේදනයකින් යුතුව ඉදිරිපත් කළ යුතුය. එමෙන්ම, නිර්මාණය පිළිබඳ වචන 80ක පමණ කෙටි පැහැදිලි කිරීමක්ද ඇතුළත් කිරීම අනිවාර්ය වේ.
අදාළ නිර්මාණ 2026 නොවැම්බර් 13 වැනිදාට පෙර ‘Logo Entry’ යන විෂය පථය යටතේ japansrilanka75@mofa.go.jp යන විද්‍යුත් තැපැල් ලිපිනයට යොමු කළ යුතුය. තරගයේ ජයග්‍රාහී නිර්මාණය 2026 දෙසැම්බර් මස අග භාගයේදී ප්‍රකාශයට පත් කිරීමට නියමිතය.
ජයග්‍රාහී නිර්මාණය සඳහා මුදල් ත්‍යාග හෝ වෙනත් වන්දි හිමි නොවන අතර, තෝරාගනු ලබන නිර්මාණයේ ප්‍රකාශන හිමිකම ජපාන විදේශ කටයුතු අමාත්‍යාංශය වෙත පැවරෙනු ඇත. දෙරට අතර පවතින දිගුකාලීන මිත්‍රත්වය සහ සහයෝගීතාව විදහා දැක්වෙන නිර්මාණ සඳහා වැඩි අවධානයක් යොමු කෙරේ.
