කිරි ගොවීන් මුහුණ දෙන ගැටලු සහ ඔවුන්ගේ ව්‍යාපෘතිවල පවතින අඩුපාඩු සොයා බැලීම සඳහා කෘෂිකර්ම අමාත්‍ය ලාල් කාන්ත මහතා මෑතකදී කොටගල ප්‍රදේශයේ නිරීක්ෂණ චාරිකාවක නිරත විය. එහිදී අමාත්‍යවරයා රොසිටා වතුයායේ කිරි ගොවිපළවල් සහ හැරින්ටන් වතුයායේ පෞද්ගලික සත්ත්ව ගොවිපළවල් වෙත ගොස් ගොවීන් සමඟ සාකච්ඡා කළේය.
මෙම සංචාරයේදී අමාත්‍යවරයා සඳහන් කළේ, ජාතික පශු සම්පත් මණ්ඩලයට අයත් කොටගල රොසිටා ගොවිපළේ මේ වන විට වගා නොකර පවතින ඉඩම් කොටස් කිරි ගොවීන්ගේ කර්මාන්තය දියුණු කිරීම සඳහා ලබා දීමට පියවර ගන්නා බවයි. අදාළ පාර්ශ්ව සමඟ සාකච්ඡා කර ඒ සඳහා කඩිනම් විසඳුමක් ලබා දෙන බව ඔහු වැඩිදුරටත් පැවසීය.
පසුගිය රජය සමයේ ඉන්දියාවට විකිණීමට සැලසුම් කර තිබූ ජාතික පශු සම්පත් මණ්ඩලය, වත්මන් රජය මැදිහත් වී එම ගිවිසුම් අවලංගු කර ගත් බවත්, මේ වන විට එම ආයතනය ලාභ ලබන මට්ටමට ගෙන ඒමට හැකි වී ඇති බවත් අමාත්‍යවරයා මෙහිදී පෙන්වා දුන්නේය.
මධ්‍යම පළාත් කෘෂිකර්ම දෙපාර්තමේන්තුවේ සහ සත්ත්ව නිෂ්පාදන හා සෞඛ්‍ය අමාත්‍යාංශයේ දායකත්වයෙන් මෙම වැඩසටහන සංවිධානය කර තිබුණි. තවද, නුවරඑළිය දිස්ත්‍රික්කයේ සාර්ථකව කිරි ගොවිතැන් පවත්වාගෙන යන ගොවීන් දිරිමත් කිරීම සඳහා චෙක්පත් ප්‍රදානය කිරීමක් ද අමාත්‍යවරයා අතින් සිදු විය.
