ඊජිප්තුවේ ගීසා (Giza) නගරය ආසන්නයේදී සිදුවූ දරුණු දුම්රිය අනතුරකින් පුද්ගලයන් හත්දෙනෙකු මියගොස් තවත් 100කට අධික පිරිසක් තුවාල ලබා ඇති බව විදෙස් මාධ්‍ය වාර්තා කරයි. ගීසා සිට ෆයුම් දක්වා ධාවනය වෙමින් තිබූ දුම්රියක්, මාර්ගයේ නතර කර තිබූ තවත් දුම්රියක පිටුපස ගැටීමෙන් මෙම අනතුර සිදුව ඇත.
අනතුරේ ප්‍රබලත්වය හේතුවෙන් දුම්රිය මැදිරි කිහිපයක් පීලි පැන බෑවුමකට පෙරළී ගොස් ඇති අතර, ඒ තුළ සිරවී සිටි මගීන් මුදාගැනීම සඳහා ප්‍රදේශවාසීන් සහ සහන කණ්ඩායම් ක්ෂණිකව මැදිහත් වී තිබේ. මියගිය පිරිස අතර එක් දුම්රියක රියදුරු ද වන බව ඊජිප්තු සෞඛ්‍ය අමාත්‍යාංශය තහවුරු කරයි.
තුවාල ලැබූවන් අතර බරපතල තුවාල සහිත පුද්ගලයන් රැසක් සිටින බැවින්, මරණ සංඛ්‍යාව තවදුරටත් ඉහළ යා හැකි බවට බලධාරීන් අනතුරු අඟවයි. තුවාලකරුවන්ට ප්‍රතිකාර කිරීම සඳහා ප්‍රදේශයේ රෝහල් සූදානම් කර ඇති අතර, ඊජිප්තු රතු අඩසඳ සංවිධානය ද සහන කටයුතු සඳහා එක්ව සිටී.
සිද්ධිය සම්බන්ධයෙන් විධිමත් පරීක්ෂණයක් පවත්වන ලෙස ඊජිප්තු ජනාධිපති අබ්දෙල් ෆටා අල්-සිසි නියෝග කර තිබේ. අනතුර හේතුවෙන් ගීසා සහ ඉහළ ඊජිප්තු ප්‍රදේශ අතර දුම්රිය ගමනාගමනය තාවකාලිකව අත්හිටුවා ඇති අතර, විනාශ වූ මැදිරි ඉවත් කිරීමේ මෙහෙයුම් මේ වන විට ක්‍රියාත්මක වේ.
