හෝර්මුස් සමුද්ර සන්ධියේ පරිපාලන කටයුතු මින් ඉදිරියට කිසිදු විටෙක යුද්ධයට පෙර පැවති ආකාරයට ක්රියාත්මක නොවන බව ඉරාන පාර්ලිමේන්තු කථානායක මොහොමඩ් බාගර් ගලිබාෆ් පවසයි. රාජ්ය මාධ්ය වෙත අදහස් දක්වමින් ඔහු සඳහන් කළේ, ජාත්යන්තර රෙගුලාසිවලට ගරු කරමින්ම මෙම ජල මාර්ගය ඉරානයේ කොන්දේසිවලට යටත්ව පාලනය වනු ඇති බවයි.
එක්සත් ජනපදය සමඟ ස්විට්සර්ලන්තයේ පැවති සාකච්ඡා වටයකින් අනතුරුව මෙම අදහස් පළ විය. කලාපීය ගැටුම් සමනය කිරීම සඳහා ටෙහෙරානය මැදිහත් වීම ලේ වැගිරීම් වැළැක්වීමට ඉවහල් වූ බවත්, ඇමරිකානු පාර්ශ්වය සමඟ පැවති සාකච්ඡා හරහා තෙල් සම්බාධක ලිහිල් කිරීම සහ ශීත කළ අරමුදල් නිදහස් කර ගැනීම වැනි වාසි අත්කර ගැනීමට ඉරානයට හැකි වූ බවත් ඔහු වැඩිදුරටත් පැවසීය.
කෙසේ වෙතත්, ඇමරිකානු පාර්ශ්වය කෙරෙහි පවතින අවිශ්වාසය තවමත් එලෙසම පවතින බව කථානායකවරයා අවධාරණය කළේය. “අපි කිසි විටෙකත් ඇමරිකානුවන් විශ්වාස කර නැත; අනාගතයේදීත් ඔවුන් කෙරෙහි අවිශ්වාසයෙන් සිටීම සාධාරණයි” යනුවෙන් ඔහු සඳහන් කළේය.
ඉදිරි දින 60 තුළ දෙරට අතර අවසන් එකඟතාවයකට පැමිණීම සඳහා ඉහළ මට්ටමේ කමිටුවක් පත් කිරීමට ද දෙපාර්ශ්වය එකඟ වී ඇත. කලාපීය ස්ථාවරත්වය වෙනුවෙන් ඉරානයේ උත්තරීතර නායකයාගේ උපදෙස් මත රටක් ලෙස එක්සත්ව කටයුතු කිරීමේ වැදගත්කම ද ගලිබාෆ් මෙහිදී සිහිපත් කළේය.
