ඉන්දියාවේ මහාරාෂ්ට්ර ප්රාන්තයේ ප්රමුඛ පෙළේ ව්යාපාරිකයෙකුගේ පුත්රයෙකු වන 25 හැවිරිදි කේතන් අගර්වාල්ගේ මරණය සම්බන්ධයෙන් ඔහුගේ පෙම්වතිය සහ ඇගේ රහස් පෙම්වතා පොලිස් අත්අඩංගුවට පත්ව තිබේ. පසුගිය ජූනි 18 වන දින ලෝහගාඩ් බලකොටුවේදී කේතන් අඩි 350ක ප්රපාතයකට වැටී මියගොස් තිබුණේ සිය පෙම්වතිය සමඟ කඳු තරණයක නිරතව සිටියදීය.
මුලදී මෙය හදිසි අනතුරක් ලෙස වාර්තා වුවද, මියගිය තරුණයාගේ සහෝදරිය පෙම්වතියගේ හැසිරීම සම්බන්ධයෙන් සැක පළ කිරීමත් සමඟ පොලිසිය වැඩිදුර විමර්ශන ආරම්භ කළේය. එහිදී අනාවරණය වූයේ කේතන්ගේ පෙම්වතිය වන 20 හැවිරිදි සියා ප්රවීන් ගෝයල් සහ ඇගේ වසර තුනක රහස් පෙම්වතා වන චේතන් බාබුලාල් චෞද්රි එක්ව මෙම ඝාතනය සැලසුම් කර ඇති බවයි.
පොලිස් විමර්ශනවලදී හෙළි වූ පරිදි, සැකකරුවන් දෙදෙනා පසුගිය මාස කිහිපය තුළ දහස් වාරයකට අධික වාර ගණනක් දුරකථනයෙන් සම්බන්ධ වී ඇත. කේතන් සමඟ විවාහ වීමට අකමැති වූ සියා, ඔහුව ජීවිතයෙන් ඉවත් කිරීමට මෙම කුමන්ත්රණය දියත් කර තිබේ. සිද්ධිය වූ දින චේතන් කල්තියා එම ස්ථානයට පැමිණ සැඟවී සිටිමින්, සියා සමඟ එක්ව කේතන්ව ප්රපාතයට තල්ලු කර ඇති බව පොලිසිය තහවුරු කරයි.
කේතන්ගේ පියා මාධ්ය වෙත අදහස් දක්වමින් සඳහන් කළේ, තම පුතාගේ පෙම්වතියගේ දුරකථනය නිතරම කාර්යබහුලව පැවතීම පිළිබඳව ඔහු සැකයක් පළ කර තිබූ බවයි. “ඇය වෙනත් සම්බන්ධතාවක් ගැන අපට පැවසුවේ නම්, අපි මෙම විවාහය වහාම නවත්වනවා,” යැයි ඔහු කියා සිටියේය. මේ වන විට සැකකරුවන් දෙදෙනා දින 7ක පොලිස් අත්අඩංගුවේ පසුවන අතර, සිද්ධියට වෙනත් පාර්ශ්ව සම්බන්ධ දැයි සොයා වැඩිදුර පරීක්ෂණ ක්රියාත්මක වේ.
