ශ්රී ලංකාවේ සෞඛ්ය රක්ෂණ ක්ෂේත්රය තුළ නව්ය ප්රවේශයක් ලබාගැනීමේ අරමුණින් Softlogic Life Insurance PLC පසුගියදා කොළඹදී ආයෝජක සමුළුවක් පවත්වන ලදී. ‘Big Moves, Big Impact’ තේමාව යටතේ පැවැති මෙම සමුළුවේදී සමාගමේ උපාය මාර්ගික වර්ධනය සහ අනාගත ව්යාපාරික සැලසුම් පිළිබඳව කරුණු ඉදිරිපත් කෙරිණි.
පවතින ආර්ථික සහ සමාජීය වෙනස්කම් හමුවේ ශ්රී ලාංකිකයන් මුහුණ දෙන සෞඛ්ය අවදානම් සහ රක්ෂණ ආවරණ අතර පවතින පරතරය පියවීම මෙහි මූලික අරමුණයි. විශේෂයෙන්ම රටේ ජනගහනය වේගයෙන් වයස්ගත වීම සහ බෝ නොවන රෝග ව්යාප්තිය හේතුවෙන් ඉහළ යන වෛද්ය වියදම් කළමනාකරණය කරගැනීමේ වැදගත්කම මෙහිදී අවධාරණය කෙරිණි.
සමාගමේ කළමනාකාර අධ්යක්ෂ ඉෆ්තිකාර් අහමඩ් මහතා සඳහන් කළේ, වයස්ගත වන ජනගහනය හෙවත් ‘Silver Tsunami’ තත්ත්වයට මුහුණ දීම සඳහා රක්ෂණ ක්ෂේත්රය නවීකරණය විය යුතු බවයි. ඒ අනුව, වයස අවුරුදු 60 ඉක්මවූවන් සඳහා ද අඛණ්ඩ ආරක්ෂාවක් සපයන ‘Health for Life’ වැනි සෞඛ්ය රක්ෂණ විසඳුම් හරහා දිගුකාලීන සහනයක් ලබාදීමට සමාගම කටයුතු කරන බව නියෝජ්ය ප්රධාන විධායක නිලධාරී ඉන්දු ආටිගල මහතා පැවසීය.
2025 වසරේදී රුපියල් බිලියන 40 ඉක්මවූ දළ ලිඛිත වාරික ආදායමක් වාර්තා කිරීමට සමත් වූ Softlogic Life, 2026 වසරේ පළමු කාර්තුවේදී ද සියයට 37ක වාර්ෂික වර්ධනයක් පෙන්නුම් කර ඇත. ඩිජිටල් තාක්ෂණය සහ දත්ත විශ්ලේෂණය සඳහා අඛණ්ඩව ආයෝජනය කිරීම මගින් සිය මෙහෙයුම් කාර්යක්ෂමතාව ඉහළ නැංවීමට සමාගම බලාපොරොත්තු වේ.
Allianz Life Insurance Lanka සමාගම අත්පත් කර ගැනීම සහ ජාත්යන්තර ආයෝජන හිමිවීම මගින් සමාගමේ මූල්ය ශක්තිය තවදුරටත් තහවුරු වී ඇති බවද මෙහිදී සඳහන් විය. ශ්රී ලංකාවේ රක්ෂණ ක්ෂේත්රයේ පරිණාමයට නායකත්වය දෙමින්, පාරිභෝගික කේන්ද්රීය විසඳුම් ලබාදීමට තමන් කැපවී සිටින බව සමාගම වැඩිදුරටත් අවධාරණය කරයි.
