ඉන්දීය කණ්ඩායම සමඟ පැවැත්වෙන ටෙස්ට් තරගාවලිය සඳහා නම් කළ ශ්රී ලංකා සංචිතයට නිරෝෂන් දික්වැල්ලව ඇතුළත් කිරීම ක්රිකට් ක්ෂේත්රයේ දැඩි කතාබහකට ලක්ව තිබේ. ආබාධයකට ලක්ව සිටින කුසල් මෙන්ඩිස් වෙනුවට ඔහු සංචිතයට කැඳවා ඇති අතර, වසර තුනකට ආසන්න කාලයක් ටෙස්ට් කණ්ඩායමෙන් ඉවත්ව සිටි ක්රීඩකයෙකු මෙලෙස හදිසියේ නැවත කැඳවීම බොහෝ දෙනාගේ මවිතයට හේතු වී ඇත.
දක්ෂතා අතර සිටින තරුණ ක්රීඩකයින් මගහැර දික්වැල්ලට අවස්ථාව ලබාදීම සම්බන්ධයෙන් කපිල විජේගුණවර්ධන ප්රමුඛ නව තේරීම් කමිටුව වෙත සමාජ මාධ්ය ඔස්සේ ප්රබල විරෝධයක් එල්ල වෙමින් පවතී. මීට පෙර පැවති තේරීම් කමිටුව විසින් ඔහු කොන්ත්රාත් ලැයිස්තුවට පවා ඇතුළත් කර නොතිබූ පසුබිමක, නව කමිටුව පත්වූ වහාම ඔහුට මෙවැනි අවස්ථාවක් හිමිවීම සැකයට තුඩු දී ඇති බව විචාරකයෝ පෙන්වා දෙති.
මේ අතර, නව තේරීම් කමිටුවේ සාමාජිකයෙකු තවමත් පෞද්ගලික පුහුණු ඇකඩමි පවත්වාගෙන යාම සහ තේරීම් ක්රියාවලිය පිටුපස විවිධ බාහිර බලපෑම් පවතින බවට මත පළවීම හේතුවෙන් ක්රිකට් පරිපාලනය කෙරෙහි පවතින විශ්වාසය පළුදු වී ඇති බවට චෝදනා නැඟේ.
ඉන්දියාව සමඟ පැවැත්වෙන තරග දෙකකින් යුත් මෙම ටෙස්ට් තරගාවලියේ පළමු තරගය අගෝස්තු 15 වන දින ගාල්ල ජාත්යන්තර ක්රිකට් ක්රීඩාංගණයේදී ආරම්භ වීමට නියමිතය. කණ්ඩායමේ නායකත්වය ධනංජය ද සිල්වා දරන අතර, උපනායකයා ලෙස කමිඳු මෙන්ඩිස් නම් කර තිබේ.
