ගාල්ලට නුදුරින් පිහිටි ශ්‍රී ලංකාවේ මුහුදු සීමාව ආසන්නයේ ඉරාන තෙල් සැපයුම් නෞකා සමූහයක් අත්‍යවශ්‍ය සැපයුම් නොමැතිව අතරමං වී තිබේ. මෙම තත්ත්වය සම්බන්ධයෙන් ශ්‍රී ලංකාවේ ඉරාන තානාපති ආචාර්ය අලිරේසා දෙල්ඛෝෂ් මහතා බරපතළ ප්‍රකාශයක් සිදු කරමින් රජයේ නිහඬ ප්‍රතිපත්තිය විවේචනයට ලක් කර ඇත.
ජාත්‍යන්තර නීති සහ සම්මුතීන් උල්ලංඝනය කරමින් ශ්‍රී ලංකා රජය ඇමෙරිකානු බලපෑම් මත මෙම නෞකා සම්බන්ධයෙන් සිය මානුෂීය වගකීම් පැහැර හැර ඇති බව තානාපතිවරයාගේ චෝදනාවයි. මුහුදු ගමන් සහ නාවික ආරක්ෂාව පිළිබඳ ජාත්‍යන්තර ගිවිසුම්වලට අනුව ශ්‍රී ලංකාවට පැවරී ඇති වගකීම් ඉටු කිරීමට අපොහොසත් වීම ගැටලු සහගත බව ඔහු අවධාරණය කරයි.
මෙම නෞකා සමූහය ඉරානය සහ ශ්‍රී ලංකාව අතර පවතින දීර්ඝකාලීන මිත්‍රත්වය මත පදනම්ව මානුෂීය ආධාර බලාපොරොත්තු වුවද, වත්මන් රජය බටහිර හිතවාදී ඒකපාර්ශ්වික ප්‍රතිපත්ති අනුගමනය කරමින් ඊට ප්‍රතිචාර නොදැක්වීම දේශපාලන වශයෙන් පරස්පර විරෝධී බව තානාපතිවරයා පෙන්වා දෙයි.
මේ අතර, මෙම අර්බුදය හමුවේ ඉන්දියාව ද අසරණ තත්ත්වයකට පත්ව සිටින බව වාර්තා වේ. ඉන්දියාව විසින් ශ්‍රී ලංකාවේ ස්ථාපිත කරන ලද සමුද්‍රීය ගලවා ගැනීමේ සම්බන්ධීකරණ මධ්‍යස්ථානය හරහා වුවද මෙම නෞකා සඳහා මැදිහත් වීමට නොහැකි වී ඇත්තේ ඇමෙරිකානු සම්බාධකවල බලපෑම හේතුවෙනි.
පවතින භූ-දේශපාලනික උණුසුම සහ ඇමෙරිකානු බලපෑම් හමුවේ, ශ්‍රී ලංකාව සහ ඉන්දියාව යන රටවල් දෙකම මෙම නෞකා සම්බන්ධයෙන් කිසිදු ඍජු මැදිහත්වීමක් සිදු නොකරන තත්ත්වයක් උද්ගතව ඇත. කෙසේ වෙතත්, රජයේ මෙම ක්‍රියාකලාපය පිළිබඳව විපක්ෂයෙන් හෝ අදාළ අංශවලින් මෙතෙක් නිල ප්‍රතිචාරයක් ලැබී නොමැති බව සඳහන් වේ.
