ශ්‍රී ලංකා ප්‍රතිපත්ති අධ්‍යයන ආයතනය (IPS) විසින් නිකුත් කළ නවතම ආර්ථික වාර්තාවකට අනුව, රටේ ආර්ථිකය 2018 වසරේ පැවති උපරිම මට්ටමට නැවත රැගෙන ඒම සඳහා දැඩි ආර්ථික ප්‍රතිසංස්කරණ සහ ඉහළ වර්ධන වේගයක් අත්‍යවශ්‍ය වේ. 2025 වසරේදී ආර්ථිකය 5%කින් වර්ධනය වුවද, එය තවමත් අර්බුදයට පෙර පැවති නිෂ්පාදන මට්ටමට වඩා 0.8%ක් පහළින් පවතී.
ආර්ථික පර්යේෂක ආචාර්ය අසංක විජේසිංහ මහතා පෙන්වා දෙන්නේ, මෙතෙක් ආර්ථිකය යථා තත්ත්වයට පත්වීම සඳහා පාරිභෝජනය ප්‍රධාන වශයෙන් දායක වී ඇති බවයි. කෙසේ වෙතත්, තිරසාර වර්ධනයක් සඳහා ආයෝජන මට්ටම ඉහළ නැංවීම අනිවාර්ය වේ. දැනට පවතින ආයෝජන දළ දේශීය නිෂ්පාදිතයෙන් 29.6%ක් ලෙස පැවතීම, අර්බුදයට පෙර පැවති මට්ටමට වඩා සැලකිය යුතු පසුබෑමකි.
රජය අපේක්ෂා කරන 7%ක ආර්ථික වර්ධන ඉලක්කය සපුරා ගැනීම සඳහා අපනයන ක්ෂේත්‍රයේ විශාල දායකත්වයක් අවශ්‍ය බව පර්යේෂකයන් පෙන්වා දෙයි. විශේෂයෙන්ම භාණ්ඩ හා සේවා අපනයන 22.6% දක්වා වර්ධනය කර ගැනීම සහ අපනයන විවිධාංගීකරණය කිරීම මෙහිදී ප්‍රමුඛ වේ. එසේම, ජාත්‍යන්තර වෙළෙඳ සහන අහිමි වීමේ අවදානම හමුවේ නව වෙළෙඳ ගිවිසුම් සඳහා කඩිනමින් අවධානය යොමු කිරීමේ වැදගත්කම ද අවධාරණය කෙරේ.
රාජ්‍ය මූල්‍ය ප්‍රතිපත්ති සම්බන්ධයෙන් අදහස් දක්වමින් ආචාර්ය ලක්මිණි ප්‍රනාන්දු මහත්මිය සඳහන් කළේ, රාජ්‍ය ආදායම ඉහළ ගියද තවමත් බදු ක්‍රමය පවතින්නේ පරිභෝජන බදු මත රඳා පවතින 40:60ක අනුපාතයක බවයි. බදු පදනම පුළුල් කිරීම, බදු නිදහස් කිරීම් සීමා කිරීම සහ ඩිජිටල්කරණය හරහා බදු පරිපාලනය ශක්තිමත් කිරීම මගින් ඍජු සහ වක්‍ර බදු අතර අනුපාතය සමතුලිත කළ හැකි බව ඇය පෙන්වා දුන්නාය.
