බොලිවුඩ් සිනමාවේ ජනප්‍රිය නළු රන්බීර් කපූර් පසුගියදා සහභාගී වූ උත්සවයකදී පැළඳ සිටි සුවිශේෂී ඔරලෝසුවක් පිළිබඳව සමාජ මාධ්‍ය තුළ දැඩි අවධානයක් යොමු වී ඇත. ඉන්දියානු රුපියල් ලක්ෂ 35කට අධික වටිනාකමකින් යුත් මෙම ඔරලෝසුව හුදෙක් මිල අධික උපාංගයක් පමණක් නොව, සික් ආගමික ඉතිහාසය සහ උරුමය සංකේතවත් කරන නිර්මාණයකි.
හයිද්‍රාබාද්හි පැවති ‘රාමායණ’ චිත්‍රපටයේ ප්‍රචාරක උත්සවයට එක්වෙමින් රන්බීර් මෙම ඔරලෝසුව පැළඳ සිටියේය. ‘Jacob & Co.’ සන්නාමය විසින් නිෂ්පාදනය කර ඇති මෙම ‘Epic X Sher-E-Punjab Edition’ ඔරලෝසුව ලොව පුරා නිකුත් කර ඇත්තේ පිටපත් 50ක් පමණක් වන බැවින් එය ඉතා දුර්ලභ එකතුවක් ලෙස සැලකේ.
මෙම ඔරලෝසුවේ සැලසුම තුළ සික් ආගමේ දසවැනි ගුරුවරයා වන ගුරු ගෝබින්ද් සිං සහ ඛල්සා සම්ප්‍රදාය සිහිපත් කෙරෙන සංකේත ඇතුළත් කර ඇත. විශේෂයෙන්ම ඛණ්ඩා සංකේතය (Khanda), සිංහ රුව සහ එක් ඕන්කාර් (Ek Onkar) යන සංකේත මගින් ශක්තිය සහ එකමුතුකම නිරූපණය කෙරේ.
ටයිටේනියම් ලෝහයෙන් නිමවා ඇති මෙම ඔරලෝසුව අතින් වයින්ඩ් කළ යුතු යාන්ත්‍රණයකින් සමන්විත වේ. පැය 48ක කාලයක් ක්‍රියාත්මක වීමේ හැකියාව ඇති මෙම ස්විස් නිෂ්පාදනය, දිය යට මීටර් 100ක් දක්වා ජලයට ඔරොත්තු දීමේ හැකියාවෙන් ද යුක්තය. එහි නිල් පැහැති රබර් පටිය සහ විවෘත සැලසුම මගින් ඔරලෝසුවට නවීන පෙනුමක් එක් කර ඇත.
