ගිනියාවේ අගනුවර වන කොනක්රි නගරයේ පිහිටි දැවැන්ත කසළ කන්දක් කඩා වැටීමෙන් පුද්ගලයින් 30 දෙනෙකු මියගොස් ඇති බව එරට රජය නිවේදනය කරයි. අලුයම කාලයේ සිදුවූ මෙම අනතුරින් තවත් පුද්ගලයින් 22 දෙනෙකු තුවාල ලබා ඇති අතර, ඔවුන් අතරින් හය දෙනෙකුගේ තත්ත්වය බරපතළ බව වාර්තා වේ.
ප්රදේශයට ඇදහැළුණු දැඩි වර්ෂාවත් සමඟ මෙම කසළ කන්ද නායගොස් ඇති අතර, ඒ අසල තිබූ පැල්පත් සහ කූඩාරම් රැසක් සුන්බුන් යට වී තිබේ. නායයෑමේ ප්රබලත්වය කෙතරම්ද යත්, අවට තිබූ නිවාස සහ ගොඩනැගිලි පවා යට වී ඇති බව සාක්ෂිකරුවන් පවසයි.
සිද්ධියෙන් පසු ගලවා ගැනීමේ කණ්ඩායම් කැණීම් යන්ත්ර යොදා ගනිමින් සුන්බුන් අතර සිරවී සිටින පිරිස් සොයා මෙහෙයුම් දියත් කර ඇත. මෙම ඛේදවාචකය සිදුව ඇත්තේ අදාළ කසළ රඳවනය වසා දමා අපද්රව්ය නගරයෙන් පිටතට රැගෙන යාමට රජය සැලසුම් කර දින කිහිපයකට පසුව වීම විශේෂත්වයකි.
අනතුර සිදු වූ ස්ථානයට ගිනියා අග්රාමාත්ය අමඩූ ඕරි බා පැමිණ ගලවා ගැනීමේ කටයුතු අධීක්ෂණය කළේය. බටහිර අප්රිකානු කලාපයේ පවතින දුර්වල යටිතල පහසුකම් සහ දරිද්රතාව හේතුවෙන් මෙවැනි කසළ කඳු නායයෑම් වැනි ආපදා නිතරම ජන ජීවිතයට දැඩි තර්ජනයක් වී තිබේ.
