ක්‍රිෂ් ගනුදෙනුවට අදාළ නඩුව සම්බන්ධයෙන් රක්ෂිත බන්ධනාගාරගත කර සිටින පාර්ලිමේන්තු මන්ත්‍රී නාමල් රාජපක්ෂ මහතාට ඇප ලබා දීම සම්බන්ධයෙන් ගොනු කර ඇති මෝසම පිළිබඳ නියෝගය ලබන නොවැම්බර් 3 වැනිදා ප්‍රකාශයට පත් කරන බව කොළඹ ප්‍රධාන මහෙස්ත්‍රාත් අසංග එස්. බෝදරගම මහතා පසුගියදා දැනුම් දුන්නේය.
මෙම නඩුව කැඳවූ අවස්ථාවේදී සැකකරු වෙනුවෙන් පෙනී සිටි ජනාධිපති නීතිඥ අලි සබ්රි මහතා ඇප ලබා දෙන ලෙස ඉල්ලා කරුණු දැක්වීය. සැකකරු දැනට දින 50කට ආසන්න කාලයක් රක්ෂිත බන්ධනාගාරයේ පසුවන බවත්, ඔහුගේ දෙමාපියන්ගේ සෞඛ්‍ය තත්ත්වය සැලකිල්ලට ගෙන ඇප ලබා දෙන ලෙසත් නීතිඥවරයා අධිකරණයෙන් ඉල්ලා සිටියේය.
මෙහිදී අල්ලස් කොමිසම වෙනුවෙන් පෙනී සිටි සහකාර නීති අධ්‍යක්ෂවරිය ඇප ලබා දීමට දැඩි විරෝධය පළ කළාය. නඩුවේ සාක්ෂිකරුවන්ට බලපෑම් සිදුවිය හැකි බවත්, අල්ලස් හා දූෂණ චෝදනා බරපතළ තත්ත්වයක පවතින බවත් ඇය පෙන්වා දුන්නාය.
දෙපාර්ශවය විසින් ඉදිරිපත් කළ කරුණු සලකා බැලූ මහෙස්ත්‍රාත්වරයා, සැකකරු ලබන නොවැම්බර් 6 වැනිදා දක්වා තවදුරටත් රක්ෂිත බන්ධනාගාරගත කිරීමට නියෝග කළ අතර, ඇප සම්බන්ධ නියෝගය 3 වැනිදා ප්‍රකාශයට පත් කරන බව දන්වා සිටියේය.
