ආරක්ෂක රාජ්ය අමාත්ය විශ්රාමික මේජර් ජෙනරාල් අරුණ ජයසේකර මහතා විසින් පොළොන්නරුව, ඇලහැර ප්රාදේශීය ලේකම් කොට්ඨාසයේ පිහිටි දියබෙදුම පරාක්රමගම රණවිරු නිවාස ව්යාපෘතියේ විශේෂ නිරීක්ෂණ චාරිකාවක නිරත විය. ව්යාපෘතියේ ප්රතිලාභීන් මුහුණ දෙන ගැටලු හඳුනාගෙන ඒවාට කඩිනම් විසඳුම් ලබාදීම මෙම සංචාරයේ අරමුණ විය.
මෙම නිවාස ව්යාපෘතියේ පදිංචිකරුවන් නොමැති වීම හේතුවෙන් ප්රදේශයේ වන අලි තර්ජන ඉහළ ගොස් ඇති බවත්, එම තත්ත්වය ව්යාපෘතියේ පැවැත්මට බාධාවක් වී ඇති බවත් නිරීක්ෂණය විය. එමෙන්ම ජල සැපයුම, විදුලිය සහ මාර්ග සංවර්ධනය ඇතුළු යටිතල පහසුකම් කිහිපයක් මේ වන විට අඩාල වී තිබේ.
පවතින පානීය ජල ගැටලුවට විසඳුම් ලෙස කුඩා පරිමාණ ජල ව්යාපෘති සහ ප්රජා මූලික වැඩසටහන් ක්රියාත්මක කරන ලෙස අමාත්යවරයා විසින් අදාළ නිලධාරීන්ට උපදෙස් ලබා දෙන ලදී. ඒ සඳහා ඇලහැර ප්රාදේශීය සභාව සහ ප්රාදේශීය ලේකම් කාර්යාලය එක්ව කටයුතු කිරීමේ වැදගත්කම ඔහු අවධාරණය කළේය.
මෙම අවස්ථාව සඳහා නිවාස, ඉදිකිරීම් සහ ජල සම්පාදන රාජ්ය අමාත්ය ටී. බී. සරත් මහතා, පොළොන්නරුව දිස්ත්රික් ලේකම්වරයා, රණවිරු සේවා අධිකාරියේ සභාපතිවරයා ඇතුළු රාජ්ය නිලධාරීන් සහ නැගෙනහිර ආරක්ෂක සේනා ආඥාපතිවරයා ඇතුළු පිරිසක් එක්ව සිටියහ.
