ශාන්තිකර සාගරයේ හටගෙන ඇති ‘බාවි’ සුළි කුණාටුව පැයට කිලෝමීටර 200ක පමණ වේගයකින් තායිවානය දෙසට ගමන් කරමින් පවතින බව විදෙස් මාධ්ය වාර්තා කරයි. කිලෝමීටර 1,000ක් පමණ විශාල වට ප්රමාණයකින් යුත් මෙම කුණාටුව, 1987 වසරෙන් පසු තායිවානයට බලපාන විශාලතම සුළි කුණාටුව ලෙස කාලගුණ විද්යාඥයින් හඳුන්වා දෙයි.
චීන ජාතික කාලගුණ විද්යා මධ්යස්ථානය පෙන්වා දෙන්නේ, මෙම කුණාටුව උතුරු තායිවානය ආසන්නයෙන් ගමන් කර සෙනසුරාදා සවස චීනයේ ෆුජියෑන් පළාතට ඇතුළු වනු ඇති බවයි. දේශගුණික විපර්යාස සහ ‘එල් නිනෝ’ තත්ත්වය හේතුවෙන් සාගර උෂ්ණත්වය ඉහළ යාම මෙවැනි දරුණු සුළි කුණාටු ඇති වීමට ප්රධාන හේතුව වී ඇත.
තායිවාන ජනාධිපති ලායි චින්ග්-ටේ ජනතාවගෙන් ඉල්ලා ඇත්තේ දින තුනකට අවශ්ය ආහාර සහ හදිසි ආපදා බෑගයක් සූදානම් කර තබා ගන්නා ලෙසයි. ජපාන කාලගුණ විද්යා ඒජන්සිය ද ඔකිනාවා දූපත් වැසියන්ට නායයෑම්, ගංවතුර සහ දැඩි සුළං පිළිබඳව දැඩි අවධානයෙන් පසුවන ලෙස අනතුරු අඟවා තිබේ.
ඉම්පීරියල් විද්යාලයේ පර්යේෂක ෂියැන්ග්බෝ ෆෙන්ග් පවසන්නේ, මෙම කුණාටුව උණුසුම් මුහුදු ජලයෙන් විශාල ශක්තියක් ලබාගෙන ඇති බැවින් ගොඩබිමට කඩා වදින විට සිදුවිය හැකි විනාශය අතිමහත් විය හැකි බවයි. කුණාටුවේ ගමන් මඟෙහි සිදුවන සුළු වෙනසක් වුවද විශාල බලපෑමක් ඇති කළ හැකි බව විශේෂඥයින් අවධාරණය කරයි.
