අංකුඹුර පල්ලේගම ගල්කොටුව ගම්මානයේ සිදුවූ හදිසි නායයෑමකින් පුද්ගලයින් 11 දෙනෙකු ජීවිතක්ෂයට පත්වීමේ ශෝකජනක පුවතක් වාර්තා වේ. මෙම ආපදාවෙන් තවත් අට දෙනෙකු තුවාල ලබා රෝහල්ගත කර ඇති අතර, නිවාස රැසකට ද බරපතල හානි සිදුවී තිබේ.
ප්රදේශවාසීන් පවසන පරිදි, නායයෑමට පෙර දින පුරා කන්ද ප්රදේශයෙන් අසාමාන්ය ශබ්ද ඇසී ඇත. සවස් කාලයේදී හදිසියේම කන්ද කඩා වැටීම හේතුවෙන් නිවාස කිහිපයක් පස් කඳු යට වී ගොස් තිබේ. තත්පර කිහිපයක් වැනි කෙටි කාලයක් තුළ මෙම විනාශය සිදුවූ බව සිද්ධිය ඇසින් දුටුවෝ පවසති.
ආපදාවෙන් පසු ජීවිත බේරාගත් පවුල් 50කට අයත් පුද්ගලයින් 205 දෙනෙකු මේ වන විට වැල්ගාල ශ්රී සුදර්ශණාරාම විහාරස්ථානයේ ආරක්ෂිතව රඳවා ඇත. විහාරාධිපති පූජ්ය බඹරගහකන්දේ ඥාණසිරි හිමියන්ගේ මූලිකත්වයෙන් ඔවුන්ට අවශ්ය පහසුකම් සලසා දී තිබේ.
නායයෑමෙන් මියගිය 11 දෙනාගේ දේහයන් දින හතරක් තුළ සොයාගෙන විහාරස්ථාන භූමියේදී භූමදානය කිරීමට පියවර ගෙන ඇත. හදිසි ආපදා තත්ත්වය හේතුවෙන් ප්රදේශයට පිවිසෙන මාර්ග අවහිර වී තිබීම නිසා සහන කටයුතු සිදුකිරීමට ද මුලදී බාධා එල්ල විය.
සිය පවුලේ සාමාජිකයින් අහිමි වූවන් මේ වන විට දැඩි කම්පනයට පත්ව සිටින අතර, ඔවුන්ට මේ වන විට පන්සලේ රැකවරණය යටතේ සිටීමට සිදුව තිබේ. ආපදා කළමනාකරණ අංශ සහ ප්රදේශවාසීන් එක්ව සිදුකළ මෙහෙයුම්වලින් තවත් පිරිසක් නිරුපද්රිතව බේරා ගැනීමට හැකි විය.
